Norðurþing

1.

200801042 - Aðalskipulag Norðurþings

Skipulags- og byggingarnefnd Norðurþings samþykkti á fundi sínum 9. febrúar sl. að leggja til við sveitarstjórn að tillaga að Aðalskipulagi Norðurþings 2009-2029 yrði samþykkt til auglýsingar og send Skipulagsstofnun til athugunar fyrir auglýsingu, að gerðum þeim lagfæringum á tillögunni sem samþykktar voru á fundinum vegna framkominna athugasemda stofnana, sbr. fundargerð nefndarinnar. Umsögn Umhverfisstofnunar barst ekki fyrr en degi eftir fundinn og er hér gerð grein fyrir efni hennar og sett fram tillaga að svörum eða viðbrögðum við athugasemdum stofnunarinnar. Texti um athugasemdir Umhverfisstofnunar að neðan er tekinn beint úr umsögn stofnunarinnar en bætt er við skýringartexta í hornklofa þar sem talin er þörf á.

Athugasemd Umhverfisstofnunar:

Í umfjöllun um „Einstakt umhverfi og fjölbreyttar upplifanir" [í kafla 3.3], tekur Umhverfisstofnun undir að fjölbreytni náttúru og landslags í Norðurþingi er einstök og gerir svæðið áhugavert til ferðalaga og búsetu. Gjástykki er eitt af þeim svæðum sem fjallað er um og fram kemur að Gjástykki sé „flatlend heiðarlönd með stöku fellum er standa upp úr landinu". Einnig kemur fram að „Syðst er nyrsti hluti Kröflueldahrauns sem rann á árunum 1975 - 1984 kolsvart og nánast ógróið"  Umhverfisstofnun bendir á að nútímahraun í Gjástykki eru einstæð bæði á lands- og heimsvísu með ótrúlegri fjölbreytni hrauntraða og hraunmyndana sem njóta verndar samkvæmt 37. grein laga nr. 44 frá 1999 um náttúruvernd og telur stofnunin afar mikilvægt að vernda þau svæði.

Tillaga að svari:

Í kafla 21.1.1 í aðalskipulagstillögunni er gerð grein fyrir ákvæðum 37. gr. laga um náttúruvernd. Sýnt er á þemakorti hvaða svæði í Norðurþingi eru háð þeim ákvæðum en þar á meðal er hraun í Gjástykki.

Brotabelti Gjástykkis er að auki skilgreint sem verðmætt svæði á heimsvísu, sbr. kafla 21.1.3 og hverfisverndarsvæði, sbr. svæði Hv5 í kafla 23.18. Norðurþing telur því ekki að ábending Umhverfisstofnunar gefi tilefni til breytinga á aðalskipulagstillögunni.

Athugasemd Umhverfisstofnunar:

Umhverfisstofnun tekur undir umfjöllun sveitarfélagsins um Gjástykki [í kafla 4.4] þar sem segir: „Ekki er gert ráð fyrir virkjun háhita í Gjástykki  inn í Norðurþing", enda telur stofnunin afar mikilvægt að vernda hið sérstæða hraunsvæði þar.

Tillaga að svari:

Ábendingin gefur ekki tilefni til breytinga á aðalskipulagstillögunni.

Athugasemd Umhverfisstofnunar:

Í kafla [9.1] um [ferðaþjónustu sem] lykilatvinnuveg kemur fram að: „Á landbúnaðarsvæðum er heimilt að reka minni tjaldsvæði og púttvelli."  Að mati Umhverfisstofnunar er mikilvægt að hugtakið minni tjaldsvæði væri skilgreint nánar.    

Tillaga að svari:

Með minni tjaldsvæðum er átt við svæði þar sem einungis er salernisaðstaða og kalt og/eða heitt vatn, en ekki þjónusta sem vænta má að sé í boði á stærri tjaldsvæðum, s.s. rafmagn fyrir tjaldvagna og húsbíla og baðaðstaða. Þessari skýringu verður bætt inn í greinargerð aðalskipulagstillögunnar.

Athugasemd Umhverfisstofnunar:

Umhverfisstofnun tekur undir áætlanir er miða að því að bæta aðstæður fyrir hjólandi og gangandi [sbr. kafla 11.5]. Stofnunin vekur athygli á að á uppdrætti er fylgir umfjöllun eru göngu- og reiðleiðir felldar saman. Umhverfisstofnunar bendir á að í dag eru reið- og gönguleiðir að hluta aðskildar og ætti að sýna það á uppdrættinum.

Tillaga að svari:

Þetta verður lagfært í samræmi við útgefin kort af göngu- og reiðleiðum í Norðurþingi.

Athugasemd Umhverfisstofnunar:

Umhverfisstofnun bendir á að varðandi veiðar í vötnum og ám [sbr. kafla 15.5], að í lögum nr. 61/2006 um lax og silungsveiði með síðari breytingum er gerð sú krafa að öll veiðifélög eða veiðiréttahafar, þar sem ekki eru veiðifélög, skuli setja nánari reglur um veiðiálag, svo sem stangarfjölda, netafjölda, daglegan og árlegan veiðitíma og aðrar takmarkanir á afla, veiðarfærum eða beitu, sem nauðsynlegar teljast fyrir sjálfbæra nýtingu fiskstofna. Þessar reglur, sem nefndar hafa verið nýtingaráætlun, þarf Fiskistofa að staðfesta að fenginni umsögn Veiðimálastofnunar. Sinni veiðifélög eða veiðiréttarhafar ekki þessari skyldu sinni getur Fiskistofa að eigin frumkvæði sett slíkar reglur. Reglur þessar skulu ná til allra stofna í fersku vatni, svo sem lax, sjóbirtings, sjóbleikju auk staðbundinna silungsstofna í ám og vötnum og áls.

Tillaga að svari:

Eftirfarandi tilvísun verður bætt inn í greinargerð: „Veiðifélög eða veiðirétthafar skulu setja nýtingaráætlun, sbr. lög nr. 61/2006 um lax og silungsveiði."

Athugasemd Umhverfisstofnunar:

Umhverfisstofnun tekur undir greinargóða stefnu um vistvæn innkaup og grænt bókhald umhverfisstefnu fyrir fyrirtæki og stofnanir [í kafla 18.3].

Tillaga að svari:

Ábendingin gefur ekki tilefni til breytinga á skipulagstillögunni.

Athugasemd Umhverfisstofnunar:

Umhverfisstofnun tekur undir stefnu um varnir gegn mengun vatns [í kafla 19.1] og vekur auk þess athygli á því að þegar rammatilskipun um vatn verður orðin að lögum mun þurfa að endurskoða alla verndun og nýtingu vatns í sveitarfélaginu. Sjá tillögu til þingsályktunar á http://www.ust.is/Mengunarvarnir/Vatnatilskipunin/

Tillaga að svari:

Ábendingin gefur ekki tilefni til breytinga á skipulagstillögunni.

Athugasemd Umhverfisstofnunar:

Í umfjöllun um jarðefni [í kafla 20.4], er greinargóð stefna um efnisnám, en ekki er farið yfir stefnu er varðar sjálf efnistökusvæðin í sveitarfélaginu.  Að mati Umhverfisstofnunar mætti koma fram hvar ætlað er að vera með helstu efnistökusvæðin á aðalskipulagstímabilinu. Einnig er mikilvægt að áætla efnisþörf í sveitarfélaginu á gildistíma aðalskipulagsins. Í umfjöllun um efnistöku úr árfarvegum og vötnum kemur fram að hafa eigi samráð við Landgræðslu ríkisins vegna slíks. Hið rétta er að sækja þarf um leyfi til Fiskistofu, en samráðið við Landgræðslu ríkisins þarf að vera ef hætta er á landbroti vegna efnistökunnar. Ef um er að ræða efnistöku úr sjó utan netlaga, þá þarf að sækja um leyfi til Orkustofnunar.

Tillaga að svari:

Efnistökusvæði eru sýnd á skipulagsuppdráttum og gerð er grein fyrir hverju og einu þeirra í kafla 23.14 um efnistökusvæði í dreifbýli og í kafla 24.3.13 um efnistökusvæði innan þéttbýlis Húsavíkur og kafla 27.2.13 um efnistökusvæði á Raufarhöfn. Engin efnistökusvæði eru innan þéttbýlismarka Kópaskers.

Ekki er unnt að áætla heildar efnisþörf í sveitarfélaginu á gildistíma aðalskipulagsins en að einhverju leyti er hægt að sjá fyrir í hverskonar eða hvaða framkvæmdir kemur til með að þurfa efni.  Um það er fjallað í  kafla 20.4 í umhverfisskýrslu skipulagstillögunnar en þar segir: „Flestar námurnar í aðalskipulagstillögunni eru í úr námuskrá Vegagerðarinnar og hafa verið og verða að öllum líkindum helst notaðar í vegaframkvæmdir. Námur sem ekki koma úr skrá Vegagerðarinnar eru ný náma í Höfuðreiðarmúla í landi Einarsstaða og Skarðaborgar í Reykjahverfi, námur við Króklág, Katla og í Skógargerðismel á Húsavík og náma í landi Eyvindarstaða í Kelduhverfi. Einnig eru skilgreindar námur sem áformað er að nýta í tengslum við lagningu háspennulína og virkjanavega frá Þeistareykjum." Miðað við ofangreint er ekki talin þörf á breytingum á aðalskipulagstillögunni vegna athugasemda Umhverfisstofnunar en umfjöllun um leyfisveitingar Fiskistofu og Orkustofnunar verður lagfærð til samræmis við ábendingar stofnunarinnar.

Athugasemd Umhverfisstofnunar:

Umfjöllun um stefnu varðandi skógrækt [í kafla 21.3] er greinargóð, en þar sem í sveitarfélaginu Norðurþingi eru víða jarðmyndanir er falla undir 37. grein laga nr. 44/1999 um náttúruvernd, og svæði á náttúruminjaskrá, vill stofnunin benda á að í 10. gr. reglugerðar nr. 583/2000 um innflutning, ræktun og dreifingu útlendra plöntutegunda kemur fram að: „Öll ræktun útlendra tegunda hér á landi er óheimil á friðlýstum svæðum, á landslagsgerðum er njóta sérstakrar verndar og alls staðar ofan 500 metra hæðar yfir sjó."              

Tillaga að svari:

Tilvísun í þetta ákvæði verður bætt inn í kafla 21.1.1 um verðmæt vistkerfi og landslagsgerðir skv. 37. gr. laga um náttúruvernd, í kafla 21.4 um landgræðslu og kafla 23.16 um náttúrverndarsvæði.

Athugasemd Umhverfisstofnunar:

Svæði F8, sem er frístundasvæði í Þverárdal, F9 sem er frístundasvæði að Þrastarlundi í landi Ærlækjar  og F10 sem er frístundabyggð að Dranghólum í landi Ærlækjar [í kafla 23.11] eru svæði sem eru inni á hverfisvernduðu svæði Hv10 sem er skóglendi Öxarfjarðar og Kelduhverfis [sbr. kafla 23.18]. Umhverfisstofnun minnir á að í stefnumörkun stjórnvalda til 2020, Velferð til framtíðar, sjálfbær þróun í íslensku samfélagi  kemur fram að: "Forðast verði eins og kostur er að skerða frekar votlendi, birkiskóga og önnur lykilvistkerfi Íslands."  Því er mikilvægt að mati stofnunarinnar að við deiliskipulagningu frístundabyggðar á svæðinu, verði forðast að skerða upprunalegan birkiskóg.      

Tillaga að svari:

Stefna aðalskipulagstillögunnar er að lykilvistkerfi Íslands séu vernduð, þ.m.t. birkiskógur og votlendi, sbr. kafla 19.3 um verndun líffræðilegrar fjölbreytni. Helstu votlendissvæði eru skilgreind sem hverfisverndarsvæði, sbr. Hv4 Votlendi við Öxarfjörð, Hv14 Norðurströnd Melrakkasléttu og Hv16 Vatnasvæði Sléttu, sbr. kafla 23.18. Í kafla 21.1.5 um svæði sem eru verðmæt á svæðisvísu er fjallað um skóglendi Öxarfjarðar og Kelduhverfis og þar er sett fram stefna um að svæðunum skuli haldið eins óröskuðum og unnt er og náttúrulegri framvindu leyft að ráða en heimilt sé að rækta til að stöðva uppblástur. Einnig segir að ekki sé gert ráð fyrir skógrækt og efnistöku á svæðunum og að frístundabyggð í skóglendi Öxarfjarðar skuli hagað þannig að hún skerði náttúrulegan birkiskóg sem minnst. Svæðið er ennfremur skilgreint sem hverfisverndarsvæði en hluti þess er friðlýstur innan Vatnajökulsþjóðgarðs. Miðað við ofangreint er ekki talin þörf á breytingum á aðalskipulagstillögunni vegna ábendingar Umhverfisstofnunar en í ákvæðum um ofangreind frístundabyggðarsvæði í kafla 23.11 verður hnykkt á þeirri stefnu sem kemur fram um verndun birkiskóga í kafla 19.3 og 21.1.5.  

Athugasemd Umhverfisstofnunar:

Í umfjöllun um sorpförgunarstaði [í kafla 23.15] eru taldir upp þrír staðir, ein móttöku- og flokkunarstöð sem hefur starfsleyfi til 2018 og tvö urðunarsvæði sem bæði hafa starfsleyfi til 2012. Þar sem aðalskipulagstillagan nær til 2029 telur Umhverfisstofnun að fjalla ætti um stefnu sveitarfélagsins í sorpförgunarmálum í aðalskipulaginu.

Tillaga að svari:

Í kafla 12.6 í umhverfisskýrslu kemur fram að reiknað sé með að sorpförgunarsvæði geti nýst út skipulagstímabilið þó svo gildandi starfsleyfi nái ekki lengra en til 2012 og 2018. Texta þar um verður bætt inn í aðalskipulagsgreinargerð í kafla 12.7 um sorpförgun og/eða 23.15 um sorpförgunarsvæði.

Athugasemd Umhverfisstofnunar:

Í umfjöllun um náttúruverndarsvæði [í kafla 23.16] er listi yfir náttúruverndarsvæði í sveitarfélaginu, þar á meðal Mývatn og Laxá. Að mati Umhverfisstofnunar á 3. gr. laga nr. 97/2004 um verndun Mývatns og Laxár í Suður-Þingeyjarsýslu erindi í aðalskipulagstillöguna, en þar segir:  „Óheimilt er að valda spjöllum eða raski á lífríki, jarðmyndunum og landslagi á landsvæði því sem um getur í 1. mgr. 2. gr. Breytingar á hæð vatnsborðs stöðuvatna og rennsli straumvatna eru óheimilar nema til verndunar og ræktunar þeirra, enda komi til sérstakt leyfi Umhverfisstofnunar. Leita skal leyfis Umhverfisstofnunar fyrir hvers konar framkvæmdum sem haft geta áhrif á lífríki, jarðmyndanir og landslag á landssvæði því sem um getur í 1. mgr. 2. gr. Þó skulu heimilar án sérstaks leyfis Umhverfisstofnunar framkvæmdir samkvæmt staðfestu skipulagi, enda hafi stofnunin fallist á skipulagsáætlun þá sem um er að ræða."                           

Varðandi svæðið Nv 3, sem er náttúruvættið: Dettifoss, Selfoss og Hafragilsfoss svo og næsta nágrenni þeirra austan Jökulsár á Fjöllum, telur Umhverfisstofnun mikilvægt að fram komi að samkvæmt reglum er varða friðlýsinguna er: „Mannvirkjagerð, jarðrask og breytingar á landi, vatnsborðshæð eða rennsli vatna er háð leyfi Umhverfisstofnunar að fenginni umsögn umsjónanefndar um málefni náttúruvættisins."

Tillaga að svari:

Ofangreindum ákvæðum verður bætt inn í kafla 23.16.1 í greinargerð aðalskipulagstillögunnar.

Athugasemd Umhverfisstofnunar:

Í umfjöllun um samgöngur er greinargóð yfirferð um vegi í sveitarfélaginu. Á uppdrætti aðalskipulagstillögunnar eru merktir fjölmargir vegir á heiðum Kelduhverfi, og telur Umhverfisstofnun nauðsynlegt að skilgreina þá vegi sem ætlaðir eru fyrir akstur vélknúinna ökutækja. Að mati stofnunarinnar er full ástæða til að skilgreina hvaða slóðar séu ætlaðir/færir vélknúinni umferð og hvaða slóðar eru reiðleiðir og gönguleiðir.

Tillaga að svari:

Aðalskipulagstillagan festir legu stofn- og tengivega en setur fram almenna stefnu varðandi aðra vegi, þ.e. héraðsvegi, landsvegi, einkavegi og aðra vegi utan þjóðvegakerfisins. Gert er ráð fyrir að á legu þeirra verði tekið með deiliskipulagi og/eða framkvæmdaleyfi og í mati á umhverfisáhrifum eftir því sem við á. Varðandi afréttarvegi á heiðum Kelduhverfis er sett fram sú stefna að tveir af þeim verði skilgreindir sem ferðamannaleiðir og skuli þeim haldið við sem slíkum, þ.e. Gamla Reykjaheiðarveginum niður hjá Fjöllum og vegslóða upp frá Eyvindarstöðum meðfram Nibbuhrauni (þar sem eru hellar) og framhjá Kerlingarhóli (eldstöð), sbr. stefnu um vegakerfi í kafla 11.1.  Ekki eru tök á að marka frekari stefnu um umferð um slóða í aðalskipulagstillögunni.

Athugasemd Umhverfisstofnunar:

Í umfjöllun um stóriðju á Bakka [í kafla 7 í umhverfisskýrslu] er tafla er sýna skal áhrif þeirrar stefnu að byggja upp álver með framleiðslugetu allt að 346.000 tonn á Bakka á samfélagið í sveitarfélaginu. Þar kemur fram að áhrifin eru talin jákvæð, en það álit er ekki rökstutt með neinum hætti í texta, heldur eru áhrifin sögð veruleg. Að mati Umhverfisstofnunar þarf að rökstyðja þetta mat á áhrifum á samfélag, auk þess bendir stofnunin á að hér er litið eins þröngt á samfélagsleg áhrif framkvæmdanna og hægt er. Einnig eru áhrif vegna athafnastarfsemi á Bakka og vegna nýrrar hafnar á land, loft og vatn sögð neikvæð og óviss. Umhverfisstofnun telur að áhrif slíkra framkvæmda ættu að vera nokkuð þekkt og lítil óvissa um þau. Áhrif á byggðamynstur er metið nokkuð jákvætt. Einnig þarf að rökstyðja matið á byggðamynstur og mætti í því sambandi líta til þróunar byggðamynsturs á austurlandi. Áhrif á lýðheilsu eru metin hlutlaus. Við svo miklar framkvæmdir eins og fyrirhugaðar eru, er ljóst að fjöldi manna mun stunda erfið störf og áhættusöm. Að mati Umhverfisstofnunar þarf að rökstyðja hvernig sveitarfélagið hyggst ná þessu takmarki, og um leið bendir stofnunin á að erfitt sé fyrir sveitarfélagið að setja sér slík takmörk þar sem það mun ekki verða framkvæmdaraðili.

Tillaga að svari:

Umfjöllun um umhverfisáhrif álvers í umhverfisskýrslu aðalskipulagstillögunnar byggir á umhverfisskýrslu Mannvits (2009) sem unnin var fyrir breytingu á Aðalskipulagi Húsavíkur 2005-2025. Sú breyting hefur verið samþykkt af sveitarstjórn Norðurþings og er nú til lokaafgreiðslu hjá Skipulagsstofnun og síðan umhverfisráðherra. Stefnan og umhverfismat hennar hefur því fengið þá umfjöllun sem ákvæði skipulags- og byggingarlaga og laga um umhverfismat áætlana segja til um. Enga síður eru lagðar til eftirfarandi lagfæringar til að koma til móts við athugasemdir Umhverfisstofnunar.

Í kafla 7 í umhverfisskýrslu er mat á áhrifum uppbyggingar á Bakka á samfélag rökstutt með því að mikil umsvif verði á framkvæmdatíma og bein og óbein störf muni skapast til langs tíma litið. Tilgreindur er sá fjöldi starfa sem talinn er að verði til og sá fjöldi íbúða sem talin er þörf á skv. því mati sem unnið hefur verið eftir til þessa (gögn úr kynningu Tryggva Finnssonar á borgarafundi á Húsavík 3.4.2008). Fram kemur að unnið sé að frummatsskýrslu vegna álvers en þar mun verða fjallað nánar um samfélagsáhrif auk þess sem deiliskipulag álverslóðar mun háð lögum um umhverfismat áætlana. Ekki er hægt að ganga lengra í umfjöllun um samfélagsáhrif í umhverfisskýrslu aðalskipulagstillögunnar að svo stöddu þar sem skýrsla um samfélagsáhrif álversins hefur ekki verið birt. Þessi útskýring verður sett inn í umhverfisskýrsluna.

Við mat á áhrifum á lýðheilsu var á þessu stigi einkum horft til áhrifa sem yrðu af starfsemi álvers en ekki til áhrifa á framkvæmdatíma þar sem gert var ráð fyrir að um þau væri fjallað í mati á umhverfisáhrifum framkvæmdanna og beitt viðeigandi mótvægisaðgerðum. Til langs tíma litið var talið að jákvæð áhrif bætts atvinnuöryggis á heilsufar íbúa vægju upp á móti mögulegum neikvæðum áhrifum álvers á heilsufar íbúa. Ennfremur liggja ekki fyrir upplýsingar um möguleg óþægindi vegna hávaða, lyktar, birtu eða ryks. Ekki er því hægt að segja nánar til um áhrif á lýðheilsu á þessu stigi og er gert ráð fyrir að þau verði nánar metin við deiliskipulagsgerð og við mat á framkvæmdunum, sbr. lög um umhverfismat áætlana og lög um mat á umhverfisáhrifum framkvæmda. Texta þar um og ofangreindar útskýringar á mati á lýðheilsuáhrifum verður bætt inn í kafla 7.2.

Mat á jákvæðum áhrifum á byggðarmynstur byggir á því að fjölgun starfa vegna álvers muni styrkja byggð á svæðinu og þar með stuðla að því að núverandi byggðarmynstur viðhaldist og eflist til lengri tíma. Texta um þetta verður bætt inn í kafla 7.

Mat á áhrifum athafnastarfsemi á Bakka, sbr. kafla 7.2, á land, loft og vatn byggir á því að ekki liggur ljóst fyrir hvert eðli og umfang starfseminnar verður. Á þessu stigi er því einungis hægt reikna með að áhrifin kunni að verða neikvæð á þessa umhverfisþætti m.a. vegna aukinnar umferðar og þess að vænta má einhverrar grófrar iðnaðarstarfsemi á svæðinu. Nánari umfjöllun um umhverfisáhrif uppbyggingar á svæðinu er vísað til deiliskipulags, sbr. lög um umhverfismat áætlana, og verður texta þar um bætt inn í kafla 7.2. Sama á við um nánari umfjöllun um umhverfisáhrif hafnargarðs við Húsavíkurhöfða en um þau verður jafnframt fjallað skv. lögum um umhverfisáhrif framkvæmda.

Athugasemd Umhverfisstofnunar:

Í aðalskipulagstillögunni er gert ráð fyrir miklum áformum um uppbyggingu stóriðju á Bakka við Húsavík, og nauðsynlegar hafnarframkvæmdir. Að mati Umhverfisstofnunar þarf um leið og stefna er sett varðandi slíka uppbyggingu að líta raunsönnum augum á samsvarandi framkvæmdir sem risið hafa á landinu, læra af þeim og skoða ávinning og kostnað.

Tillaga að svari:

Um áhrif álvers og tilheyrandi framkvæmda verður nánar fjallað við deiliskipulagsgerð og mat á umhverfisáhrifum framkvæmdanna. Sjá að öðru leyti svar við næstu athugasemd að ofan.

Ennfremur hefur skipulags- og byggingarfulltrúa borist ósk frá landeigendum Laxamýrar um að frístundahúsasvæðið við Laxamýri verði stækkað til austurs auk þess sem heimiluð verði þétting núverandi byggðar vestan vegar.  Afmörkun stækkunar yrði núverandi girðing í norðri, vegur í vestri, jarðamörk í suðri og mörk verndarsvæðis Laxár í austri.  Gert er ráð fyrir allt að 20 lóðum innan stækkunarinnar.

Skipulags- og byggingarnefnd fellst á stækkun frístundahúsasvæðisins skv. framkomnum óskum og fellst jafnframt á að í deiliskipulagi megi skilgreina þéttingu byggðar innan núverandi afmörkunar um allt að fimm lóðir.

Skipulags- og byggingarnefnd felur skipulagsráðgjöfum að breyta tillögunni til samræmis við ofangreint og leggur til við sveitarstjórn að tillagan verðisamþykkt til auglýsingar og send til yfirferðar hjá Skipulagsstofnun sbr. 2. mgr. 17. gr. skipulags- og byggingarlaga.

2.

201002061 - Og fjarskipti sækja um, f.h. eiganda Smjörhóls, leyfi til að stofna lóð undir fjarskiptabúnað

Meðfylgjandi umsókn er hnitsett lóðarmynd.

Skipulags- og byggingarnefnd leggur til við sveitarstjórn að stofnun lóðarinnar verði samþykkt, enda sýni umsækjandi fram á umboð sitt til umsóknarinnar.

3.

200912021 - Einar G. Jónasson f.h. Brautarenda ehf. sækir um leyfi fyrir breyttri starfsemi á jarðhæð Garðarsbrautar 39

Við grenndarkynningu breyttrar notkunar atvinnuhúsnæðis á jarðhæð Garðarsbrautar bárust athugasemdir/fyrirvarar frá meðeigendum í fjölbýlishúsinu, Sigurði Jóhannsyni og Jakobi Hjaltalín.  Eftirfarandi fyrirvarar eru gerðir:

1.  Að einkaréttur íbúðaeigenda til bifreiðastæða verði ætíð virtur.

2.  Að gengið verði frá þremur hurðum í sameiginlegan stigagang eins og lofað hefur verið.

3.  Að aðgengi að sameiginlegu vatnsinntaki í kjallara hússins verði lagað.

4.  Að þeim verði sýnd afrit úttektarskýrslna eftirlitsaðila til staðfestingar á því að húsnæði sé fullnægjandi frágengið.

5.  Að starfsemi hefjist ekki fyrr en að öllum úrbótum sé lokið og að viðeigandi eftirlitsaðilar hafa úrskurðað um að viðeigandi kröfur séu uppfylltar.

Skipulags- og byggingarnefnd telur þá starfsemi sem fyrirhuguð er í atvinnuhúsnæði á jarðhæð Garðarsbrautar 39 falla innan ramma þess sem eðlilegt sé talið innan íbúðarsvæða skv. Skipulagsreglugerð og samþykkir því breytta notkun eignarinnar.  Athugasemdir/fyrirvarar sem meðeigendur hússins gera lúta fyrst og fremst að sambýli í fjöleignahúsi og hafa ekki áhrif á afgreiðslu skipulags- og bygingarnefndar.  Nefndin áréttar þó að ekki skuli hefja breytta starfsemi fyrr en að aflokinni úttekt eftirlitsaðila (heilbrigðiseftirliti, vinnueftirliti og eldvarnareftirliti) að húsnæðinu til samræmis við ábendingu meðeigenda í húsinu.