PCC - Iðnaðarstarfsemi á Bakka

Fyrir framkvæmda- og hafnanefnd liggur til afgreiðslu samningur milli hafnasjóðs Norðurþings og PCC BakkiSillicon hf. vegna iðnaðaruppbyggingar á Bakka. Garðar Garðarsson, lögfræðingur sveitarfélagsins hefur farið yfir og kynnt samninginn fyrir nefndinni, eins og hann liggur fyrir. PCC BakkiSillicon hf., er í eigu þýska fyrirtækisins PCC se, sem hyggst byggja og reka kísilverksmiðju í landi Bakka við Húsavík. Framkvæmda- og hafnanefnd Norðurþings samþykkir samhljóða fyrirliggjandi hafnasamning milli hafnasjóðs Norðurþings og PCC BakkiSilicon hf., og leggur til við bæjarstjórn að hann verði samþykktur. Nefndin veitir bæjarstjóra og hafnastjóra heimild til að undirrita samninginn fyrir hönd hafnasjóðs Norðurþings.

Forseti setti fund og bar upp ósk um að fundargerð 32. fundar framkvæmda- og hafnanefndar sem fram fór 30. júlí yrði tekin inn á dagskrá bæjarstjórnar með afbrigðum. Beiðnin samþykkt samhljóða. Fyrir bæjarstjórn liggur til afgreiðslu lóðasamningur milli sveitarfélagsins Norðurþings og PCC BakkiSillicon hf., vegna iðnaðaruppbyggingar í landi Bakka við Húsavík. Til máls tóku: Bergur, Hjálmar Bogi, Jón Grímsson, Þráinn, Soffía, Gunnlaugur, Jón Helgi og Olga. Bæjarstjórn Norðurþings samþykkir samhljóða fyrirliggjandi lóðasamning milli sveitarfélagsins Norðurþings og PCC BakkiSillicon hf., og felur bæjarstjóra og forseta bæjarstjórnar að undirrita samninginn fyrir hönd sveitarfélagsins. Bókun bæjarstjórnar: Ljóst er að með samþykki fyrirliggjandi samninga er tekið stórt skref fram á við varðandi uppbyggingu í landi Bakka við Húsavík. Sveitarfélagið Norðurþing hefur hér með gengið frá þeim samningum sem nauðsynlegir eru fyrir framvindu verkefnisins, í góðri sátt við þýska fyrirtækið PCC se. Það er eindregin von bæjarstjórnar Norðurþings að senn líði að því að sú uppbygging sem stefnt hefur verið að hefjist innan tíðar, íbúum svæðisins til hagsbóta.