Hraðið-Nýsköpunarsetur óskar eftir aðkomu Norðurþings vegna FabLab Húsavík

Bergur Elías Ágústsson leggur fram eftirfarandi tillögu;

Lagt er til að Norðurþing styrki verkefnið FabLab Húsavík um eina og hálfa milljón króna árlega næstu tvö árin.

Greinargerð.
Fyrir liggur erindi frá Hraðið - Nýsköpunarsetur (Þekkingarnet Þingeyinga) þar sem greint er frá að unnið sé, m.a. að því að koma á laggirnar stafrænni tæknismiðju. Mjög áhugaverðu verkefni sem vonandi mun ganga vel. Farið er fram á árlegt framlag að upphæð 5 m.kr.
Sem stendur er unnið að gerð fjárhagsáætlunar og kjörnir fulltrúar meðvitaðir um að sú áætlun er ekki auðveld og því þarf að forgangsraða og það nokkuð hraustlega að þessu sinni. Sem samvinnu- og félagshyggjumaður og í ljósi fjárhagsramma fræðslusviðs, félagsþjónustu sem og íþrótta og æskulýðsmála tel ég rétt að beina þeim fjármunum sem mögulega hægt er á framandgreind svið. Að svo stöddu tel ég ekki ráðlegt að Norðurþing skuldbindi sig um tug eða tugi milljóna króna í framangreint verkefni. Rétt er, engu að síður, að skoða þessa stöðu að ári liðnu og kanna hvort mögulegt sé að sveitarfélagið komi inn í verkefnið með meira afgerandi hætti en að framan getur og þá í góðri samvinnu og samráði við skólasamfélag Norðurþings.

Benóný Valur tekur undir tillögu Bergs en leggur til að fjárhæðin verði 2,5 milljónir í eitt ár og verði endurskoðuð að ári.

Byggðarráð samþykkir tillögu Benónýs samhljóða.

Byggðarráð lýsir ánægju með stofnun Hraðsins - nýsköpunarmiðstöðvar og FabLab Húsavík. Byggðarráð felur fjölskylduráði að vinna málið áfram m.t.t. afnota skóla sveitarfélagsins að FabLab.

Samhliða fjárhagslegri aðkomu Norðurþings verði sveitarstjóra falið að fara þess á leit við mennta- og menningarmálaráðneyti og atvinnuvega- og nýsköpunarráðuneyti að FabLab-smiðjan á Húsavík verði viðurkennd og gerður samningur um rekstur hennar líkt og er með aðrar FabLab-smiðjur.

Fjölskylduráð felur fræðslufulltrúa að tryggja að ákvæði um afnot leik- og grunnskóla Norðurþings verði hluti af samningi Norðurþings við Hraðið-nýsköpunarmiðstöð og FabLab vegna framlags sveitarfélagsins um 2.500.000 króna.