Allir lesa - landsleikur í lestri
Í kjölfarið, þann 17. október, verður efnt til landsleiks í lestri, þar sem hópar skrá sig til leiks og lesa til sigurs. Sá tími sem keppendur verja í bóklestur er skráður á vefinn, og það lið sem ver mestum tíma í lestur að meðaltali ber sigur úr býtum. Allar bækur eru taldar með, allt frá Harry Potter til Halldórs Laxness, myndasögum til menningarstórvirkja, kennslubókum til Kardimommubæjarins. Aðalatriðið er að skemmta sér við lestur, gera lífið áhugaverðara og lesa til sigurs.
Keppt er í þremur flokkum; skólaflokki og vinnustaðaflokki, auk opins flokks. Að auki er haldið utan um skiptingu milli kynja, aldursflokka og sveitarfélaga. Þannig geta sveitarfélögin lagt kapp sitt á að lesa betur en önnur sveitarfélög, og vakið athygli og hvatt sitt fólk áfram á samfélagsmiðlum og víðar. Í sameiningu gerum við lestur áhugaverðari, skemmtilegri og meira spennandi – fyrir alla.
Í hverju liði geta verið allt að 50 keppendur. Einn liðsstjóri þarf að vera í hverju liði, sem hefur það hlutverk að hvetja sitt fólk til dáða og aðstoða fólk við skráningu, eftir atvikum. Eigi einhverjir erfitt um vik með að skrá lesturinn inn á netið er hægt að fylla út skráningarblöð og fá liðsstjórann til að skrá fyrir sig.
Meðfylgjandi eru PDF skjöl með hugmyndum til að virkja
þátttakendur í raunheimum og á netinu, og hvernig má nýta bókalista
í tengslum við leikinn. Sömuleiðis má nálgast hvers kyns ítarefni, til útprentunar og birtingar á vefnum á eftirfarandi slóð:
https://www.dropbox.com/sh/icqwkly2qxu6gy6/AACQAx3eknQXPOwVwmOBN3aJa?dl=0
Frekari gögn munu bætast inn í þessa möppu með tímanum.
Allar nánari upplýsingar er hægt að nálgast á netfanginu allirlesa@allirlesa.is, og sömuleiðis á vefnum, Allirlesa.is, eftir að hann opnar, þann 10. október. Liðakeppnin hefst svo þann 17. október.
Við vonum að þið skemmtið ykkur og lesið vel. Einnig bendum við á samfélagsmiðlana, þar sem ýmsar hvatningar, aukaleikir og fleira skemmtilegt verður í gangi.
http://www.facebook.com/allirlesa
http://www.twitter.com/allirlesa
http://www.instagram.com/allirlesa