Ríflega 700 hátíðargestir 1. maí
Íþróttahöllin á Húsavík var þétt setin 1. maí þegar ríflega 700 hátíðargestir mættu
til að fagna degi verkalýðsins 1. maí. Þrátt fyrir þennan mikla fjölda tókst öllum að finna sér sæti til að njóta
skemmtiatriðanna.
Hátíðardagskráin var þétt skipuð af úrvalsatriðum. Aðalsteinn Á. Baldursson formaður Verkalýðsfélags
Húsavíkur og nágrennis flutti ávarp við setningu hátíðarinnar og Steini Hall flutti síðan Internationalinn í tilefni
dagsins.
Marimba hópur Tónlistarskóla Húsavíkur tók síðan við með tónlistarflutning og krakkar úr Tónlistarsmiðjunni
,,Líf án áfengis" stigu á stokk með dægurlög við mikinn fögnuð áheyrenda. Lára Sóley Jóhannsdóttir
lék snilldarlega á fiðlu við undirleik Aladár Rácz. Óskar Pétursson, stórtenór og skemmtikraftur sýndi lipra takta og skemmti
jafnt ungum sem öldnum með söng og sprelli. Skúli Thoroddsen framkvæmdarstjóri Starfsgreinasambands Íslands flutti síðan
hátíðarræðu í tilefni dagsins.
Síðastir á svið voru svo Ljótu Hálfvitarnir með tónlistaratriði eins og þeim einum er lagið enda líklega ekki á færi
annarra.
Að loknum skemmtiatriðum buðu stéttarfélögin upp á kaffiveitingar og þrátt fyrir þennan mikla fjölda hátíðargesta
tókst á skammri stund að skenkja öllum tertu sem vildu.
Stéttarfélögin vilja þakka öllum þeim sem lögðu höndina á plóginn við að gera þessa hátíð svo
glæsilega sem raun ber vitni og jafnframt þakka öllum þeim sem lögðu leið sína í íþróttahöllina til að fagna
þessum degi með okkur.