Tillaga að breytingu á aðalskipulagi
Tillaga að breytingu á Aðalskipulagi Húsavíkurbæjar 2005-2025 Háspennulínur, Reykjaheiðarvegur og iðnaðarlóð á Bakka
Sveitarstjórn Norðurþings auglýsir hér með tillögu að breytingu á aðalskipulagi Húsavíkurbæjar 2005-2025 skv. 1. mgr. 21. gr. skipulags- og byggingarlaga nr. 73/1997 m.s.br.
Ath. Uppdráttur 3 hér fyrir neðan hefur verið uppfærður.
Breytingin felst í nánari útfærslum á stefnu gildandi aðalskipulags varðandi fyrirhugaðar framkvæmdir innan Norðurþings sem ákvarðaðar hafa verið í sameiginlegt mat á umhverfisáhrifum. Breytingar eru gerðar á staðsetningu háspennulína, veglínu Reykjaheiðarvegar og iðnaðarlóð við Bakka stækkuð. Staðsetning háspennulína var ákvörðuð með svæðisskipulagi háhitasvæða í Þingeyjarsýslum 2007-2025. Einnig er nú mörkuð stefna um 11 efnistökusvæði vegna virkjunarvegar og háspennulína.
Breytingartillagan verður til sýnis á sveitarstjórnarskrifstofu Norðurþings að Ketilsbraut 7-9 á Húsavík frá og með miðvikudeginum 25. nóvember n.k. til og með miðvikudagsins 23. desember. Tillagan verður einnig til sýnis á heimasíðu Norðurþings.
Þeir sem telja sig eiga hagsmuna að gæta er hér með gefinn kostur á að gera athugasemdir við breytingartillöguna. Frestur til að skila inn athugasemdum er til miðvikudagsins 6. janúar 2010. Skila skal athugasemdum á sveitarstjórnarskrifstofu Norðurþings. Hver sá sem ekki gerir athugasemdir við breytingartillöguna innan tilskilins frests telst samþykkur henni.
Fylgiskjöl:
Greinargerð um breytingu á aðalskipulagi
Umhverfisskýrsla - viðauki við breytingar á aðalskipulagi
Uppdráttur 3 (uppfært 30.11)
Húsavík 25. nóvember 2009
Gaukur Hjartarson
Skipulags- og byggingarfulltrúi Norðurþings