Bæjarráð Norðurþings

Aðalsteinn Árni Baldursson mætti á fundinn og fór yfir starfsemi erlendra fyrirtækja á félagssvæði Framsýnar. Bæjarráð þakkar frumkvæði og starf Framsýnar stéttarfélags við hagsmunagæslu á svæðinu og lýsir vilja við að vinna með félaginu að málinu.

Bæjarráð felur bæjarstjóra að koma á fundi með 40% meðeiganda fasteignarinnar að Höfða 24c, Leikfélagi Húsavíkur, þar sem farið verður yfir framtíðaráform í húsnæðismálum félagsins. Jafnframt verði komið á sameiginlegum fundi húseigenda með tilboðsgjafa. Einnig er bæjarstjóra falið að láta verðmeta eignina. Afstöðu til erindis tilboðsgjafa er frestað.

Bæjarráð samþykkir að óska eftir að framkvæmdastjóri Atvinnuþróunarfélags Þingeyinga mæti á fund bæjarráðs til að ræða starfsemi félagsins. Málinu vísað til fjárhagsáætlunargerðar 2016.

Bæjarráð samþykkir að falla frá forkaupsrétti á 1,1 milljón kr. og taka þátt í aukningu hlutafjár fyrir kr. 1.887.194 í samræmi við fyrri ákvarðanir um hlutafjáraukningu í félaginu.

Bæjarráð tekur undir áhyggjur smábátafélagsins Kletts af þróun mála af byggðakvóta á Húsavík. Norðurþing hefur á liðnum mánuðum sent formleg erindi til sjávarútvegsráðuneytisins og hefur bæjarstjóri tekið málið upp við sjávartútvegsráðherra. Þá hafa bæjarfulltrúar Norðurþings rætt málið við þingmenn án jákvæðrar niðurstöðu.

Vegna fyrirsjáanlegrar hækkunar á rekstrarkostnaði sveitarfélagsins árið 2016, samþykkir bæjarráð að þrengja ramma nokkurra sviða og felur bæjarstjóra og fjármálastjóra að fara yfir stöðuna með sviðsstjórum og kynna forsendur þessarar ákvörðunar.