Byggðarráð Norðurþings

Fyrir byggðarráði liggur yfirlit yfir innheimtu útsvarstekna í janúar og febrúar 2020 ásamt rekstraryfirliti málaflokka fyrir janúarmánuð 2020.

Á 317. fundi byggðarráðs var tekið fyrir erindi Hólmsteins Helgasonar ehf. varðandi aðstöðu eldri borgara í fasteigninni Breiðablik á Raufarhöfn.
Á fundi ráðsins var bókað;
Byggðarráð fagnar frumkvæði að þessu erindi og felur sveitarstjóra að taka saman upplýsingar um kostnað sveitarfélagsins við rekstur Breiðabliks undangenginna ára og leggja fyrir ráðið að nýju á næsta fundi þess.

Byggðarráð vísar erindinu til umfjöllunar í skipulags- og framkvæmdaráði.

Þekkingarnet Þingeyinga og Atvinnuþróunarfélag Þingeyinga vinna nú saman að verkefninu Tæknimennt sem byggðaaðgerð sem hlaut styrk úr Uppbyggingarsjóði Norðurlands eystra. Megin markmið verkefnisins er að ýta undir tæknimennt og stafræna færni í grunnskólum á svæðinu enda alveg óhætt að segja að aukin færni á þeim sviðum sé til framtíðar mikilvægt byggðamál.
Hluti af verkefninu er að setja saman spennandi "dótakassa", sem ber heitið Þingeyska snjallkistan. Uppbyggingarsjóður Norðurlands eystra styrkti verkefnið og skilyrði fyrir styrkveitingunni er að aflað verði fjár á móti frá vinnustöðum á svæðinu til að kosta kaup á búnaði í kistuna.
Óskað er eftir styrk frá sveitarfélaginu í samræmi við eftirfarandi flokkun;

- Flokkur I: Styrkir undir 50.000 kr.
- Flokkur II: Styrkir á bilinu 50.000-100.000 kr.
- Flokkur II: Styrkir yfir 100.000 kr.

Borist hefur bréf frá eftirlitsnefnd sveitarfélaga þar sem óskað er eftir yfirliti um stöðu einstakra fjárfestingaverkefna í árslok 2019 í samræmi við bréf nefndarinnar frá því í mars 2019. Óskað er eftir að umbeðnar upplýsingar berist nefndinni eigi síðar en 60 dögum eftir dagsetningu bréfsins.

Borist hefur erindi frá Ásmundi Einari Daðasyni, félags- og barnamálaráðherra og Bergsteini Jónssyni, framkvæmdastjóra UNICEF á Íslandi þar sem auglýst er eftir umsóknum áhugasamra sveitarfélaga til þátttöku í verkefninu Barnvæn sveitarfélög. Barnvæn sveitarfélög (www.barnvaensveitarfelog.is) er líkan sem styður við innleiðingu Barnasáttmála Sameinuðu þjóðanna inn í stjórnsýslu og starfsemi sveitarfélaga. Verkefnið hefur til þessa verið innleitt í þremur sveitarfélögum en langir biðlistar hafa skapast. Með stuðningi Félags- og barnamálaráðherra mun nú öllum sveitarfélögum á landinu standa til boða að gerast barnvæn sveitarfélög á næstu árum.

Boðað er til aðalfundar Skúlagarðs-fasteignafélags ehf. fimmtudaginn 12. mars 2020 kl. 17:00.

Fyrir byggðarráði liggur fundargerð stjórnar Markaðsstofu Norðurlands frá 5. febrúar 2020.

Fyrir byggðarráði liggja fundargerðir 1. til 7. fundar stjórnar Atvinnuþróunarfélags Þingeyinga ses., fundargerðirnar eru frá tímabilinu 28. júní 2019 til 29. janúar 2020.

Á 317. fundi byggðarráðs var tekið til umræðu erindi Samgöngu- og sveitarstjórnarráðuneytisins varðandi umsögn um drög að frumvarpi til breytinga á sveitarstjórnarlögum og lögum um tekjustofna sveitarfélaga.
Á fundi ráðsins var bókað;
Lagt fram til kynningar og tekið til umræðu á næsta fundi ráðsins.

Mennta- og menningarmálaráðuneyti kynnir til samráðs mál nr. 32/2020, "Reglugerð um héraðsskjalasöfn".
Umsagnarfrestur er til og með 13.3.2020.