Byggðarráð Norðurþings

Formaður byggðarráðs leggur til að reglubundinn fundur sveitarstjórnar Norðurþings sem áætlaður er þann 17. ágúst frestist til 24. ágúst.

Fyrir byggðarráði liggur yfirlit yfir rekstur málaflokka tímabilið janúar til júní sem og yfirlit yfir útsvarstekjur fyrir tímabilið janúar til júlí.

Erindi frá Hauki Eiðssyni hefur borist byggðarráði þar sem hann, f.h. smábátaeigenda á Húsavík skorar á byggðarráð að beita sér gegn heimild til veiða með dragnót í Skjálfanda.

Sveitarstjóri hefur tekið saman minnisblað um stöðu mála er varðar möguleg kaup á nýjum dælubíl fyrir Slökkvilið Norðurþings.

Umræður um þann farveg og tímalínu sem sveitarfélagið þarf að móta um kaup á nýrri dælubifreið.

Vinnuskjal um mögulega sviðsmynd að uppbyggingu og afnotum Verbúða á Hafnarstétt á Húsavík liggur fyrir byggðarráði. Minnisblaðið er unnið af Arngrími Jóhannssyni f.h. Norðurslóðasetursins, fulltrúum Steinsteypis ehf og Reinar ehf.

Fyrir byggðarráði liggur fundargerð Hverfisráðs Öxarfjarðar frá 22. febrúar sl.

Með ákvörðun ráðherra, dags. 19. mars 2020, var sveitarstjórnum veitt heimild til að víkja frá tilteknum ákvæðum sveitarstjórnarlaga til að tryggja starfshæfi sitt og auðvelda ákvarðanatöku við stjórn sveitarfélags, á grundvelli VI. bráðabirgðaákvæðis sveitarstjórnarlaga. Um var að ræða heimild sveitarstjórnar til að:

1. Nota fjarfundarbúnað á fundum sveitarstjórna án takmarkana
2. Víkka út valdsvið einstakra nefnda og fækka þannig nefndarfundum
3. Fela fastanefnd eða einstökum starfsmönnum sveitarfélags fullnaðarafgreiðslu tiltekinna mála sem varða ekki verulega fjárhag sveitarfélags, þrátt fyrir að kveðið sé á um annað í samþykktum sveitarfélags.

Fyrir byggðarráði liggur fundargerð aðalfundar Menningarmiðstöðvar Þingeyinga frá 7. júní sl. ásamt ársreikningi Menningarmiðstöðvarinnar fyrir árið 2020.

Umhverfis- og auðlindaráðuneytið undirbýr nú uppfærslu á skýrslu um stöðu innleiðingar Árósasamningsins hér á landi. Skýrsla verður þriðja skýrsla Íslands um innleiðingu samningsins. Skýrslan verður unnin í samráði við umhverfisverndarsamtök og tekur ráðuneytið einnig við öllum ábendingum frá almenningi um efni hennar.

Ísland fullgilti í október 2011 Árósasamninginn um aðgang að upplýsingum, þátttöku almennings í ákvarðanatöku og aðgang að réttlátri málsmeðferð í umhverfismálum. Þar með varð Ísland fullgildur aðili að samningnum og því starfi sem tengist honum. Auk aðildarríkjaráðstefnu sem og ríkjafundum sem haldnir eru árlega eru á vettvangi samningsins reknir vinnuhópar um helstu málefni samningsins, þ.e. aðgang að upplýsingum, þátttökuréttindi almennings og aðgang að réttlátri málsmeðferð.

Á fjögurra ára fresti ber aðildarríkjum að skila aðildarríkjaskýrslu til skrifstofu samningsins þar sem farið er yfir stöðu innleiðingar ákvæða samningsins í viðkomandi ríki. Síðast skiluðu aðildarríkin skýrslu árið 2017 og var Ísland þar á meðal. Á þessu ári eiga aðildarríkin að skila skýrslu að nýju og verður hún til umræðu á næsta aðildarríkjaráðstefnu samningsins. Mikilvægt er að öll sjónarmið komi fram, bæði sjónarmið stjórnvalda, almennings og félagasamtaka sem nýta sér þann rétt sem aðild að samningnum veitir.

Umhverfis- og auðlindaráðuneytið vill vekja athygli á því að unnið er að undirbúningi skýrslu Íslands sem skilað verður á þessu ári. Á næstunni verða birt í samráðsgátt drög að skýrslunni til kynningar og athugasemda en auk þess mun ráðuneytið eiga sérstakt samráð við umhverfisverndarsamtök um efni hennar. Þá vill ráðuneytið hvetja alla þá sem áhuga hafa til að koma með ábendingar eða annað sem varðar væntanlega skýrslu. Tekið verður við almennum ábendingum og athugasemdum í samráðsgátt stjórnvalda til og með 23. ágúst nk. auk þess sem unnt verður að gera athugasemdir við drög að skýrslunni þegar þau verða birt.