Viðbrögð vegna bilunar dælubíls Slökkviliðsins á Húsavík

Til umræðu í byggðarráði liggur greinargerð slökkviliðsstjóra um ástand bifreiða slökkviliðsins. Dælubifreið liðsins á Húsavík hefur verið biluð og erfiðlega gengið að fá varahluti til viðgerðarinnar. Velt er upp mögulegum næstu skrefum til að tryggja sem best öryggi íbúa jafnt sem starfsmanna sveitarfélagsins við störf sín fyrir slökkviliðið.

Á 356. fundi byggðarráðs var bókað;
Byggðarráð felur sveitarstjóra að greina þarfir og stilla upp valkostum vegna endurnýjunar á dælubifreið Slökkviliðs Norðurþings.

Fyrir byggðarráði liggja nú umbeðin gögn og mun Grímur Kárason slökkviliðsstjóri koma á fund byggðarráðs og fylgja málinu eftir.

Á 357. fundi byggðarráðs var bókað;
Byggðarráð þakkar Grími fyrir komuna og felur sveitarstjóra að vinna málið áfram í samráði við slökkviliðsstjóra. Mikilvægt er að tryggja aðgengi að lánsbifreið til næstu missera á meðan unnið er að útfærslu fjárfestingarinnar er varða kaup og smíði á nýjum dælubíl til sveitarfélagsins. Sveitarstjóri mun leggja fyrir ráðið að nýju upplýsingar um kostnað við lánsbifreið.

Umræður um þann farveg og tímalínu sem sveitarfélagið þarf að móta um kaup á nýrri dælubifreið.

Á 369. fundi byggðarráðs var bókað;
Byggðarráð leggur til að gert verði ráð fyrir kaupum á nýrri dælubifreið fyrir Slökkvilið Norðurþings í fjárhagsáætlun 2022 og þriggja ára áætlun. Sveitarstjóra er falið að hefja undirbúning frekari þarfagreiningar á bifreið og útboðsferli kaupanna.

Fyrir byggðarráði liggja gögn vegna innkaupa á slökkvibifreið sem og upplýsingar um innkaupaferlið.
Grímur Kárason slökkviliðsstjóri og Hjalti Jón Pálsson sérfræðingur hjá Ríkiskaupum koma á fund byggðarráðs.