Félagsmálanefnd

Þann 29. nóvember 2016 barst sveitarstjórn Norðurþings fyrirspurn frá Sjálfsbjörg um aðbúnað og öryggismál í ferðaþjónustubifreiðum fyrir fatlaða með vísan í reglugerð nr. 822/2004 með síðari breytingum.
Sveitarstjóri Norðurþings svaraði erindinu með tölvupósti þann 12.12.2016 Í viðhengi með tölvupósti voru myndir sem teknar voru í bifreið Fjallasýnar sem annast ferðaþjónustu fatlaðra fyrir hönd sveitarfélagsins. Myndirnar sýna að öllum öryggiskröfum skv. áðurnefndri reglugerð er fullnægt.
Erindið Sjálfsbjargar ásamt myndum frá Fjallasýn lagt fram til staðfestingar.

Lög um almennar íbúðir nr. 52/2016 tóku gildi á Alþingi þann 15. júní sl. í 1. gr. laganna segir: Markmið laga þessara er að bæta húsnæðisöryggi fjölskyldna og einstaklinga, sem eru undir tekju- og eignarmörkum skv. 10. gr. við upphaf leigu, með því að auka aðgengi að öruggu og viðeigandi leiguhúsnæði og stuðla að því að húsnæðiskostnaður sé í samræmi við greiðslugetu leigjenda eða að jafnaði ekki umfram fjórðung tekna. Í því skyni er ríki og sveitarfélögum heimilt að veita stofnframlög til byggingar og kaupa á almennum íbúðum til að stuðla að því að í boði verði leiguíbúðir á viðráðanlegu verði fyrir þá sem þurfa á því að halda, þ.m.t. fyrir námsmenn, ungt fólk, aldraða, fatlað fólk og fólk sem ekki er fært um að sjá sér fyrir húsnæði sökum félagslegra aðstæðna eða verulegs fjárhagsvanda.
Með gildistöku laga um almennar íbúðir verða ekki lengur sérlausnir í málaflokki fatlaðs fólks.
Þann 7. des sl. sendi Þroskahjálp erindi til bæjarstjórnar þar sem þeir hvetja stjórnendur sveitarfélaga eindregið til að huga sérstaklega að aðstæðum og þörfum fólks með þroskahömlun og fatlaðs fólks almennt þegar gerðar eru áætlanir í húsnæðismálum. Vísað er til samnings Sameinuðu þjóðanna um réttindi fatlaðs fólks sem íslensk stjórnvöld hafa fullgilt.

Þann 1. desember sl. var sent erindi til Heilbrigðisstofnunar Norðurlands og Rauða kross Íslands þar sem óskað var eftir tilnefningu í starfshóp um bætta þjónustu við einstaklinga með geðraskanir í Norðurþingi.
Hópurinn hefur verið skipaður, einum aðila frá HN einum frá RKÍ og einum frá Félagsþjónustu Norðurþings sem jafnframt verður formaður hópsins og leiðir starfið.

Hinn 16. júní sl. samþykkti Alþingi lög nr. 75/2016, um húsnæðisstuðning. Gildistökudagur laganna var þann 1. janúar sl. og leysa þau eldri lög um húsaleigubætur af hólmi.
Með 32. gr. hinna nýju laga um húsnæðisstuðning varð gerð breyting á 45. gr. laga nr. 40/1991, um félagsþjónustu sveitarfélaga, og eftirfarandi þremur málsgreinum bætt inn í þá lagagrein:
Sveitarfélög skulu veita sérstakan húsnæðisstuðning í samræmi við nánari reglur sem sveitarstjórn setur.
Sveitarfélög skulu veita foreldrum eða forsjáraðilum 15-17 ára barna sem leigja herbergi á heimavist eða námsgörðum vegna náms fjarri lögheimili húsnæðisstuðning. Stuðningurinn skal vera óháður tekjum og eignum foreldra eða forsjármanna og ekki yfir 75% af húsnæðiskostnaði vegna leigunnar.
Í þessari viðbót felst sú breyting frá eldra fyrirkomulagi opinbers húsnæðisstuðnings (valkvæðar sérstakar húsaleigubætur sveitarfélaga) að öllum sveitarfélögum var frá og með 1. janúar sl. skylt að veita sérstakan húsnæðisstuðning.
Jafnframt er það nýmæli í lögunum að sveitarfélög skuli veita foreldrum eða forsjáraðilum 15-17 ára barna, sem leiga herbergi á heimavist eða námsgörðum vegna náms fjarri lögheimili, húsnæðisstuðning.

Með gildistöku laga nr. 75/2016, um húsnæðisstuðning breytast reglur Norðurþings um félagslegar leiguíbúðir til samræmis við þau lög. Reglur Norðurþings um félagslegar leiguíbúðir hafa því verið uppfærðar til samræmis við lög um húsnæðisstuðning. Helsta breytingin er að eigna og tekjumörkum hefur verið breytt, þau hækkuð.

Forvarnarhópur er starfræktur í sveitarfélaginu. Í honum eiga sæti félagsmálastjóri, æskulýðsfulltrúi, fulltrúar frá lögreglu, Heilbrigðisstofnun Þingeyinga, auk fulltrúa frá grunnskólanum og framhaldsskólanum.
Ekki er til forvarnarstefna Norðurþings og því verið óljóst eftir hverju hópurinn á að vinna.
Hópurinn hefur verið upplýsingahópur þ.e. aðilar hafa skipst á upplýsingum um hvað er í gangi hjá ungmennum á Húsavík og hverju þurfi helst að fylgjast með.

Á síðasta ári var gerður samningur við Félag eldri borgara -Húsavík um að þeir sinntu tómstundastarfi fyrir eldri borgara á Húsavík. Samningurinn var bundinn húsaleigu FEB í Snælandi.
FEB-Húsavík hafa nú eignast sitt eigið húsnæði og flutt starfsemi sína úr Snælandi.
Spurning er hvort gera eigi annan samning við FEB-Húsavík um tómstundastarf fyrir eldri borgara og hvað sá samningur á að fela í sér. Lagt fram til umræðu.

Samkvæmt reglum um félagslega heimaþjónustu Norðurþings á að uppfæra gjaldskrána um áramót til samræmis við launaflokk 126 hjá STH. Lagt fram til staðfestingar

Borist hefur boð á kynningarfund frá Jafnréttissjóði Íslands sem haldinn verður 20. janúar n.k. Jafnréttissjóður Íslands styrkir verkefni sem auka jafnrétti kynjanna, markmið hans er að styrkja verkefni á sviði jafnréttismála en sjóðurinn hefur yfir að ráða 100 milljónum í árlega styrki á árunum 2016-2020. Lagt fram til umræðu. Ekki er boðið upp á að hlusta á fundinn í fjarfundarbúnaði en fundargerð verður send til okkar eftir fundinn.