Framkvæmdanefnd

Farið hefur fram skoðun og gróft kostnaðarmat á "lýsishúsi" á lóð SR á Raufarhöfn, með það fyrir augum að húsið verði gert upp og nýtt undir sýninguna "Þorpið" sem til stendur að setja upp þar.
Áætlun kostnaðar við verkefnið er eftirfarandi:
- Einangrun og endurnýjun á þaki - 4,5 m.
- Málning innanhúss - 1,0 m.
- Málning utanhúss - 1,0 m.
- Endurnýjun raflagna og lýsing - 1,5 m.
Fyrir liggur styrkur upp á 6,0 m úr sjóðum brothættra byggða til verkefnisins.

Til umræðu er að breyta starfstitli Garðyrkjustjóra Norðurþings í Umhverfisstjóra Norðurþings.
Breytingunni er fyrst og fremst ætlað að ná utan um aukin verksvið sem í dag heyra undir starfið, þ.m.t. sorpmál, urðunarmál, umhverfismál á skipulagssviði o.fl.

Fyrir liggur erindi varðandi uppbyggingu og skipulag við lýsistanka á Raufarhöfn.
Óskað er eftir stuðningi sveitarfélagsins vegna umsóknar um styrk í Framkvæmdasjóð ferðamannastaða fyrir hönnun á umhverfi tankanna og aðgengi að þeim.

Fjarskiptasjóður mun úthluta 450 m.kr. til uppbyggingar sveitarfélaga á ljósleiðarakerfum árið 2018 líkt og sjóðurinn gerði vegna uppbyggingar þeirra árin 2016 og 2017. Í ljósi þess að fjárhagur og aðstæður sveitarfélaga er mismunandi hefur verið ákveðið að styrkja samkeppnisstöðu tiltekinna sveitarfélaga gagnvart umsóknum í samkeppnispott fjarskiptasjóðs vegna 2018. Sérstökum 100 m.kr. byggðastyrk er varið til þessa verkefnis.

Byggðastyrknum er skipt í tvo hluta að þessu sinni. Annars vegar er 10 m.kr. úthlutað beint til tiltekinna "brothættra byggða" og hins vegar er 90 m.kr. úthlutað samkvæmt aðferð sem hér er útlistuð. Notast er við vog við samanburðarmat á aðstæðum í sveitarfélögum og fjárfestingargetu þeirra. Sveitarfélög fá þannig einkunn eða stig í samræmi við innbyrðis uppröðun þeirra á grundvelli töflu 1. Sveitarfélög sem fá fæst samanlögð stig lenda efst í forgangsröðun gagnvart byggðastyrknum. Þau sveitarfélög sem lenda efst í
forgangsröðun hljóta þannig byggðastyrk vegna 2018.

Alls hlýtur sveitarfélagið Norðurþing styrk að upphæð 9,9 mkr. Hlutfallslega er það skv. útreiknuðum byggðastryk 6,4 mkr og til brothættra byggða 3,5 mkr.

Fyrir framkvæmdanefnd liggur að taka afstöðu til erindis Arctic Edge Consulting ehf varðandi möguleg kaup Norðurþings á íbúðum í fyrirhuguðu fjölbýlishúsi við Útgarð.
Jafnframt er óskað eftir afslætti á gatnagerðargjöldum til jafns við áður auglýstan afslátt slíkra gjalda á völdum byggingasvæðum.

Í ljósi vætutíðar undangenginna daga og vikna þykir illgerlegt að ganga endanlega frá yfirborði gatna á svæði E í Holtahverfi. Ef farið verður í að malbika hverfið á þessum tímapunkti, er líklegt að endurtaka verði stóran hluta af verkinu næsta sumar vegna óstöðugleika jarðvegs og þ.m.t. undirlags í götum.
Fyrir framkvæmdanefnd liggur að taka ákvörðun um hvort halda skuli verkáætlun eða hvort nýta skuli ákvæði um óvissu verkloka vegna annarra verkefna og veðurs og fresta gatnaframkvæmdum til næsta vors.

Fyrir liggur lauslegt kostnaðarmat á þeim framkvæmdum sem ráðast þarf í til þess að hægt verði að leigja húsnæði verbúða á Hafnarstétt undir þá matvælastarfsemi sem stefnt er að.
Fyrir framkvæmdanefnd liggur að taka afstöðu til umfangs þeirra endurbóta sem eignasjóður þarf að fjármagna á næstu vikum og mánuðum og þá hvers konar starfsemi húsnæðið verður leigt undir þegar eignin hefur verið færð undir eignasjóð.

Fyrir framkvæmdanefnd liggur erindi frá aðilum á Raufarhöfn um að færa líkamsræktaraðstöðuna úr kjallara í anddyri íþróttahússins, en þar mun vera betri aðstaða til slíkrar starfsemi. Einnig er farið fram á að fá að nýta aðstöðuna án endurgjalds gegn því að viðkomandi aðilar sjái um nauðsynlegar breytingar á húsnæðinu til þess að koma aðstöðunni fyrir.
Salerni fyrir fatlaða verður nýtt undir þessa aðstöðu og þarf að skoða hvernig það verður leyst m.t.t. byggingareglugerða.
Einnig þarf að vinna þetta til samræmis við brunavarnir og vinnueftirlit.

Fyrir framkvæmdanefnd liggur erindi frá húsbyggjendum að Lyngholti 3 um aukið svigrúm varðandi tímamörk á fokheldi húsnæðis m.t.t. afsláttar gatnagerðargjalda.

Óskað er eftir því að sveitarfélagið sinni lúpínuslætti á bæjarlandi frá Brúnagerði 2 að Breiðagerði. Fastlega má gera ráð fyrir að um fleiri slík svæði sé að ræða og ef af verður, þarf væntanlega að gera ráð fyrir fjármagni til málaflokksins til þess að sinna verkefnum af þessum toga.

Niðurstöður liggja fyrir um úthlutun stofnframlaga til uppbyggingar íbúða á grundvelli laga nr. 52/2016. Norðurþing sótti um stofnframlög til byggingar fjögurra íbúða innan þessa nýja almenna íbúðakerfis. Tvær þeirra yrðu staðsettar við Höfðaveg 6 og tvær við Lyngholt 26-31.

Heildarstofnvirði samkvæmt umsókn Norðurþings er kr 94.230.000- og sótt var um 18% stofnframlag, 6% viðbótarframlag vegna markaðsbrest á grundvelli byggingarkostnaðar og 4% viðbótarframlag vegna þeirra íbúða sem ætlaðar eru einstaklingum með fötlun.

Lögin byggja m.a. á yfirlýsingu ríkisstjórnarinnar um húsnæðismál frá 28. maí 2015, þar sem m.a. er fjallað um fjölgun hagkvæmra og ódýrra íbúða til að tryggja tekjulágum fjölskyldum leiguhúsnæði til lengri tíma og að áhersla verði lögð á íbúðir af hóflegri stærð

Niðurstaða úthlutunarnefndarinnar var sú að samþykkja umsókn Norðurþings um samtals 24.267.200- kr stofnframlag til verkefnisins.

Farið er fram á að sveitarfélagið grípi til aðgerða til þess að koma í veg fyrir að óhreinindi af völdum þungaflutninga berist inn í starfsstöð Frumherja hf með tilheyrandi truflun á starfsemi.

Vegna hugsanlegs skorts á lóðum undir atvinnuhúsnæði er því beint til framkvæmdanefndar að tekin verði afstaða til þess hvort ljúka skuli gatnagerð til samræmis við gildandi deiliskipulag í Hrísmóum og Lyngmóum á næsta ári.

Umræða í framkvæmdanefnd um drög að fjárhags- og framkvæmdaáætlun 2018.

Lóðarhafar Þekkingarnets og Hvalasafns fara fram á endurbætur og fegrun á svæði sem nefnt er "skansinn" og er á hafnarsvæði milli Hvalasafns og Þekkingarseturs. Sveitarfélagið er einn þriggja aðila sem eiga aðkomu að málinu, en taka þarf afstöðu til þess hvernig staðið skuli að framkvæmdum á svæðinu.

Fyrir liggur viðbragðsáætlun vegna urðunarstaða í Norðurþingi. Áætlunin hefur verið samþykkt í ráðuneyti og verður lögð fyrir Umhverfisstofnun sem fylgigagn í málefnum urðunarstaða í sveitarfélaginu.

Smári Jónas Lúðvíksson fer yfir mögulegar breytingar á tilhögun landleigusamninga við endurnýjun þeirra um næstu áramót.
Mælst er til þess að samningarnir verði endurnýjaðir til eins árs svo svigrúm gefist til þess að móta þá í samvinnu við hestamenn og aðra mótaðila sem nýta sér beitarlönd og beitarhólf í eigu sveitarfélagsins.