Ársreikningur Norðurþings 2023

Byggðarráð samþykkir meðfylgjandi tillögu að vinnuferli og fyrirkomulagi funda vegna skila á ársreikningi Norðurþings 2023.

Byggðarráð þakkar Hólmgrími frá Deloitte fyrir ítarlega og góða yfirferð á ársreikningi 2023.

Byggðarráð vísar ársreikningnum til fyrri umræðu í sveitarstjórn.

Til máls tók: Katrín.

Sveitarstjórn samþykkir samhljóða að vísa ársreikningi fyrir árið 2023 til síðari umræðu í sveitarstjórn.

Lagt fram til kynningar.

Byggðarráð þakkar Níelsi Guðmundssyni fyrir góða og ítarlega yfirferð á ársreikningi 2023 og vísar honum til seinni umræðu og staðfestingar í sveitarstjórn.

Til máls tóku: Katrín, Hafrún og Hjálmar.

Meirihluti sveitarstjórnar leggur fram eftirfarandi bókun:
Undirrituð lýsa yfir ánægju sinni með að heilt yfir er rekstur sveitarfélagsins Norðurþings 2023 heldur betri en árin áður og skilar ívið meiri framlegð hjá A-hluta.
Tekjur eru að hækka á milli ára en í samstæðunni voru rekstrartekjur árið 2023 kr. 6.509 millj. og hækkuðu um 207,3 millj. milli ára eða 3,3%. Handbært fé hækkaði um 265,7 millj. kr. milli ára og var 1.722,9 millj. í árslok. Veltufjárhlutfall samstæðunnar er sterkt en það hækkar á milli ára og var 2,25 í árslok samanborið við 2,02 í ársbyrjun. Að jafnaði er horft til þess að veltufjárhlutfall sé amk yfir 1,0.
Laun og launatengd gjöld eru að hækka á milli ára í takt við launaþróun í landinu en sem hlutfall af rekstrartekjum stendur prósentan nánast í stað á milli ára. Fjöldi ársverka eykst um 1,9% hjá sveitarfélaginu, úr 311 í 317 á árinu 2023. Fjölgunin á sér að mestu leyti þá skýringu að sveitarfélagið hefur mætt langtíma veikindum með nýjum ráðningum til að halda uppi sama þjónustustigi. Fjármagnsliðir voru neikvæðir á árinu en það skýrist að mestu leyti í vöxtum og verðbótum aðallega í B hlutanum.
Rekstrarniðurstaða A og B hluta er jákvæð á árinu 2023 um 194,7 millj. kr. sem er um 386,7 millj. kr. betri niðurstaða en fjárhagsáætlun gerði ráð fyrir.
Skuldir við lánastofnanir lækka á milli ára um 51,8 mill kr. hjá samstæðunni og engin ný lán voru tekin á árinu.

Skuldahlutfall samstæðu sveitarfélagsins sem reiknað er í samræmi við reglur um fjárhagsleg viðmið sveitarfélaga var 65% í árslok 2023 samanborið við 67% í ársbyrjun. Hjá A-hlutanum var skuldahlutfallið 48% í árslok 2022 samanborið við 55% í ársbyrjun. Skuldahlutfallið lækkar þrátt fyrir aukningu heildarskulda en það skýrist helst af því að tekjur hækka nokkuð milli ára og veltufjármunir hækka einnig nokkuð. Skuldir á hvern íbúa í sveitarfélaginu eru rúmlega kr. 1,7 millj. kr.
Áframhaldandi áskoranir eru augljósar í rekstri sveitarfélaga og hjá okkur eru stórar framkvæmdir framundan en við teljum að sveitarfélagið sé í stakk búið til að taka þeim áskorunum með áframhaldandi aga í rekstri og án þess að skerða þjónustu við íbúa.
Eiður Pétursson
Hafrún Olgeirsdóttir
Helena Eydís Ingólfsdóttir
Hjálmar Bogi Hafliðason
Soffía Gísladóttir



Ársreikningur Norðurþings fyrir árið 2023 er samþykktur samhljóða.