Orkuveita Húsavíkur ohf

Í ljósi þess hversu lágt hitastig er á hitaveituvatni að Laxamýri (57°C) eru ábúendur þar að kanna hvort forsenda sé til þess að fella niður gjöld OH af heitu vatni í útihúsin þar til eins árs.
Eins og fram kemur í bréfinu hefur þessi beiðni verið borin upp áður, en ekki var orðið við henni þá.
Hafa ber í huga að afsláttur er veittur af þessu vatni vegna lágs hitastigs og OH mun tæplega afhenda 81°C heitt vatn til notenda eins og talað er um í þessu bréfi að þurfi fyrir þær þvottavélar sem notaðar eru í þeim rekstri sem þar á sér stað.
Rétt er að kanna möguleikann á því að setja framhjáhlaup/aftöppun á lögnina við Laxamýri til þess að halda uppi hitastigi á vatni til notanda.

Framkvæmdastjóri og verkstjóri OH heimsóttu Tryggva Óskarsson á Þverá með það fyrir augum að skoða vatnsveituna sem um ræðir ásamt því að meta hvaða framkvæmdir þyrfti að ráðast í til þess að veitan gæti með góðu móti sinnt þeim notendum sem tengjast henni.
Fyrirliggjandi er endurnýjun og sverun á stofni veitunnar frá vatnsbóli að sumarhúsabyggð neðan Kísilvegar á bökkum Reykjakvíslar.
Framtíðarþörf notenda kallar á allt að 90 mm stofnlögn, en núverandi lögn er 40 mm að sögn Tryggva.
Þessi sverun stofnlagnar ásamt endurnýjun miðlunartanks ofar í landinu er sérstaklega aðkallandi í ljósi fyrirhugaðrar byggingar veiðihúss á svæði veitunnar nk sumar.
Nokkuð gott aðgengi véla og tækja er að þeirri lagnaleið sem fyrirhuguð er, en gert er ráð fyrir að ný lögn verði plægð niður í vegslóðann upp að vatnsbólinu við hlið núverandi lagnar.
Meðfylgjandi er greinargerð um vatnsveituna sem gerð var í kjölfar heimsóknarinnar ásamt kostnaðaráætlun vegna endurnýjunar á henni.

Staðan í máli fyrirhugaðrar hitaveitu í Kelduhverfi er sú að fyrir lok febrúar ætti að liggja fyrir hvort og þá hverjir geri athugasemd við eignarétt Landgræðslunnar á svæðinu sem fyrirhuguð hitaveita er innan. Þá fáum við loksins að vita hverjir það eru sem við þyrftum að tala við varðandi að undirrita viðauka við afnotasamning. E.t.v. kemur út úr þessu að engin gerir athugasemdir við eignarrétt Landgræðslunnar. Ef það gerist ættum við að geta lokið samningnum við Ríkiseignir um afnotasamninginn í beinu framhaldi.

Ef einhver gerir athugasemd við eignaréttinn þá liggur ljóst fyrir að viðaukaleiðin við afnotasamninginn er sú leið sem við förum og þá þarf að fá undirskriftir hagsmunaaðila á viðaukann.

Fjárhagsáætlun OH 2017 gerir ekki ráð fyrir þeim gjaldskrárhækkunum sem tóku gildi um mitt ár 2016 ásamt því að tekjur orkuveitunnar eru almennt varlega áætlaðar fyrir árið 2017.
Rekstrargjöld eru frekar ofáætluð og einnig er gert ráð fyrir 30 milljóna kostnaði við endurbætur á húsnæði OH sem ekki er aðkallandi verkefni, nema ef vera kynni í tengslum við tilfærslu OH og áhaldahúss á Húsavík undir sama þak.
Í fjárhagsáætlun er einnig gert ráð fyrir um 65 milljónum í kaup á þjónustu frá áhaldahúsi, en skv. upplýsingum frá fráfarandi fjármálastjóra Norðurþings þá er gert ráð fyrir að sú upphæð nýtist einnig t.d. til greiðslu styrkja o.fl.
Þegar allt er talið þá er töluvert svigrúm til annara framkvæmda en þeirra sem sérstaklega eru talin upp í fjárhagsáætlun OH.

Taka þarf afstöðu til afgreiðslu styrks til Borgarhólsskóla vegna kaupa á tæknilego.

Á aðalfundi Sjóbaða ehf þann 31. maí 2016 var samþykkt tillaga stjórnar félagsins um heimild til þess að hækka hlutafé félagsins um 200.000.000 að raunvirði.
Núverandi hluthöfum Sjóbaða ehf er boðið að kaupa nýtt hlutafé í hlutfalli við núverandi eign sína.