Byggðarráð Norðurþings

Norðurhjari hefur óskað eftir að endurnýjaður verði samstarfssamningur Norðurhjara og Norðurþings fyrir árið 2019. Á fund byggðarráðs kemur Gunnar Jóhannesson formaður Norðurhjara ferðaþjónustusamtaka.

Fyrir byggðarráði liggur ársskýrsla slökkviliðs Norðurþings fyrir árið 2018. Grímur Kárason mætir á fundinn og fer yfir skýrsluna.

Í samantekt ársins kemur m.a. fram að miklar breytingar hafa orðið á starfsemi slökkviliðsins s.l. ár. Þrjú 100% stöðugildi eru hjá liðinu í dag auk þess eru tvær bakvaktarstöður frá kl. 16.00 - 08.00 alla virka daga og um helgar. Þriðja fasta staðan er tilkomin vegna samnings um að sinna viðbragðsþjónustu fyrir PCC á Bakka og önnur bakvaktarstaðan vegna samnings við HSN. Slökkviliðið er með samning við HSN á Húsavík um mönnun á öðrum af tveimur sjúkrabílum stofnunarinnar. Sá samningur tryggir að starfsmenn HSN sem sinna hinum sjúkrabílnum tilheyra bakvaktarhópi slökkviliðsins og verða grunnmenntaðir til þess á árinu 2019.

Útkallsverkefni allra þátta liðsins hafa aukist verulega og voru þau 131 á árinu 2018, sem er aukning um 84% miðað við árið á undan með tilkomu samninganna sem vitnað er til að ofan. Sundurgreint var 90 verkefnum vegna sjúkraflutninga sinnt á árinu. Slökkviliðið sinnti 18 verkefnum þar sem um var að ræða eld, reykræstingu, eiturefnaleka, klippuvinnu eða upphreinsun vegna efnaleka. Vettvangsliðahópur liðsins á Kópaskeri sinnti 23 útköllum á árinu sem er umtalsverð fjölgun frá 2017.

Til umræðu í byggðarráði er staða Skúlagarðs vegna rekstrarársins 2018 og áætlun ársins 2019. Ljóst er að félagið þarf fjármuni frá eigendum til að ná endum saman vegna nýliðins árs.

Fyrir byggðarráði liggur til staðfestingar samkomulag um fyrirkomulag skipulagsvinnu vegna fyrirhugaðrar uppbyggingar fiskeldis á svokallaðri Rönd á Kópaskeri. Vinnan við breytingar á skuplagi samkvæmt samkomulaginu kemur til vegna fyrirætlana Fiskeldis Austfjarað hf. um uppbyggingu fiskeldis og tengdri starfsemi á Kópaskeri. Með samkomulaginu fellst Norðurþing á að Landeldisstöðin Sleipnir ehf. muni, sem framkæmdaaðili, vinna tillögu að skipulagslýsingu og deilisikipulagi, á eigin kostnað, innan afmarkaðs svæðis. Komi til framkvæmda Landeldisstöðvarinnar Sleipnis ehf. á grundvelli skipulagsbreytinganna skal Norðurþing endurgreiða útlagðan kostnað vegna skipulagsvinnunnar, sem hæfilegur getur talist að hámarki 2.000.000,-, með skuldajöfnun við lokauppgjör gatnagerðargjalda. Samkomulagið felur þó með engum hætti í sér vilyrði fyrir ákveðinni afgreiðlsu sveitarfélagsins sem stjórnvalds, hvort sem það er sem skipulags- eða byggingaryfirvald, eða með öðrum hætti. Samkomulagið fellur úr gildi 31.7.2020, hafi deiliskipulag ekki verið samþykkt fyrir þann tíma.

Sveitarstjóri gerir þá tillögu að 50% staða fjölmenningarfulltrúa Norðurþings verði auglýst laus til umsóknar, til samræmis við umræður og ákvarðanir sveitarstjórnar um fjárhagsáætlun ársins 2019.

Fyrir byggðarráði liggur ákvörðunartaka vegna innheimtumáls.

Lögð er fram skýrsla starfshóps um uppbyggingu flugvallakerfisins og eflingu innanlandsflugs sem opinberuð var í byrjun desember sl. Opin kynning á skýrslunni verður haldin í dag, fimmtudag kl 17:00 á Fosshótel Húsavík.

Tilurð skýrslunnar er sú að í framhaldi af því að ný ríkisstjórn tók við stjórnartaumunum í lok nóvember 2017 óskaði Sigurður Ingi Jóhannsson, samgöngu- og sveitarstjórnarráðherra eftir að starfshópur ráðuneytisins, sem hóf störf þá um sumarið, myndi skoða núverandi skipulag á innanlandsflugi, héldi áfram að vinna samkvæmt áherslum ríkisstjórnarinnar m.a. um jafnt aðgengi og
jákvæða þróun byggða og bætta samkeppnishæfni landsbyggðanna sem og landsins alls. Þá hefur mikilvægi öryggishlutverks varaflugvalla tengt millilandaflugi aukist og nauðsynlegt að taka tillit til breyttra aðstæðna á grundvelli þróunarinnar undanfarin ár. Hópnum var falið að skoða núverandi skipulag á innanlandsflugi, fara yfir hugmyndir að breyttu fyrirkomulagi og meta hvaða fyrirkomulag sé hagkvæmast fyrir notendur til lengri tíma litið.

Í kjölfar þess að Norðurþing var valið eitt af tilraunasveitarfélögunum í húsnæðisverkefni velferðarráðuneytisins og Íbúðalánasjóðs hafa fjölmargir byggingaverktakar sett sig í samband við sveitarfélagið og viljað kynna lausnir til uppbyggingar íbúðahúsnæðis. Til kynningar og umræðu í byggðarráði eru þau erindi sem borist hafa frá fyrirtækjum og aðilum sem sýnt hafa málinu áhuga.

Fyrir byggðarráði liggur ósk Umhverfisstofnunar um að sveitarfélagið tilnefni fulltrúa sveitarfélagsins og fulltrúa umhverfis- eða náttúruverndarnefndar í vatnasvæðanefnd í samræmi við lög nr. 36/2011 og reglugerð nr. 935/2011 um stjórn vatnamála. Óskað er eftir að tilnefningin berist ekki síðar en 14. janúar 2019.

Sýslumaðurinn á Norðurlandi eystra óskar eftir umsögn sveitarfélagsins vegna umsóknar Sölkuveitinga um tímabundið tækifæris- og áfengisleyfi vegna þorrablóts Kvenfélags Húsavíkur í Íþróttahöllinni á Húsavík frá kl. 15:00 þann 19. janúar til kl. 03:00 sunnudaginn 20. janúar 2019.

Fyrir byggðarráði liggur minnisblað Önnu G. Björnsdóttur ritara íslensku sendinefndarinnar á Sveitarstjórnarþingi Evrópuráðsins frá 35. þingi þingsins 6.- 8. nóvember 2018.

Hinn 24. október 2018 skipaði forseti Alþingis starfshóp um endurskoðun kosningalaga til að fara yfir tillögur vinnuhóps um endurskoðun kosningalaga ásamt frumvarpi sem lagt var fram á Alþingi 5. september 2016, með tilliti til hagkvæmni og skilvirkni. Jafnhliða skal starfshópurinn kanna kosti þess að setja heildarlöggjöf um framkvæmd allra almennra kosninga, er taki til kosninga til Alþingis, kosninga til sveitarstjórna, framboðs og kjörs forseta Íslands og framkvæmd þjóðaratkvæðagreiðslna. Loks skal starfhópurinn skila tillögum sínum í formi lagafrumvarps 1. desember 2019. Starfshópurinn leggur áherslu á greiða upplýsingagjöf um vinnu hans og gott samráðsferli. Hópurinn óskar á fyrstu stigum vinnunnar sérstaklega eftir athugasemdum við þá hugmynd að sett verði heildarlöggjöf um framkvæmd kosninga. Á síðari stigum verður óskað eftir athugasemdum við frumvarpsdrög starfshópsins áður en tillögum hópsins verður skilað til Alþingis.

Fyrir byggðarráði liggur fundargerð 866. fundar stjórnar Sambands íslenskra sveitarfélaga.