Byggðarráð Norðurþings

Fyrir byggðarráði liggur bréf frá Framsýn stéttarfélagi hvar vakin er athygli á þeirri stöðu sem nú ríkir í samningamálum félagsmanna sem starfa hjá sveitarfélögum í Þingeyjarsýslum. Kjaraviðræður hafa staðið yfir við Samband íslenskra sveitarfélaga frá því í febrúar 2019, án niðurstöðu. Í bréfinu kemur fram að mikið ber á milli og vísaði Starfsgreinasamband Íslands, sem fer með samningsumboð Framsýnar, deilunni til ríkissáttasemjara þann 28. maí sl. Næsti fundur í deilunni hefur verið boðaður 21. ágúst n.k. hjá ríkissáttasemjara.

Samninganefnd Sambands íslenskra sveitarfélaga hefur að undanförnu samið við önnur sambönd og stéttarfélög um frestun viðræðna og friðarskyldu til 15. september. Samið hefur verið við þessa aðila um eingreiðlsu/innágreiðslu upp á kr. 105.000 miðað við fullt starf. Samninganefnd sveitarfélaga hefur neitað að slíkt tilboð standi til boða fyrir aðildarfélaga Starfsgreinasambandsins þar sem búið væri að vísa deilunni til Ríkissáttasemjara.

Þrátt fyrir þessa afstöðu samninganefndarinnar vill Framsýn fara þess á leit við sveitarfélögin á félagssvæðinu og Hvamm heimili aldraðra að þau greiði starfsmönnum sem starfa eftir kjarasamnings Starfsgreinasambands Íslands viðlíka innágreiðslu of að ofan greinir, þann 1. ágúst n.k. m.v. fullt starf.

Borist hafa afrit af svari Samgöngu- og sveitarstjórnarráðuneytis til Guðbjarts Ellerts Jónssonar og Gentle Giants hvalaferða ehf. þar sem ósk þeirra um stjórnsýsluúttekt á sveitarfélaginu er hafnað.
Í svari frá samgöngu- og sveitarstjórnarráðuneytinu við erindum Gentle Giants hvalaferða ehf og Guðbjarts Ellerts Jónssonar kemur fram að ráðuneytið telji að ekki hafi ríkt nægileg festa við álagningu og innheimtu farþegagjalda á því tímabili sem um ræðir. Þessu hefur þó verið komið í betri farveg og eru farþegagjöld nú innheimt mánaðarlega í stað árlega áður. Skipstjórum eða eigendum þeirra báta sem stunda farþegaflutninga við hafnir Norðurþings ber að skila mánaðarlega upplýsingum um farþegafjölda á meðan á farþegaflutningum stendur og skal gögnunum skilað eigi síðar en 10. hvers mánaðar fyrir næstliðinn mánuð. Álagning er ákvörðuð af sveitastjórn í tengslum við fjárhagsáætlanagerð ár hvert. Ennfremur kemur fram í svari frá ráðuneytinu að ekkert bendi til þess að sveitarfélagið hafi farið út fyrir valdheimildir sínar við gerð samninga við fyrirtæki um uppgjör farþegagjalda né að öðrum fyrirtækjum sem skulduðu slík gjöld hafi ekki boðist sömu kjör. Enda eðlilegt að sveitarfélög hafi heimildir til að semja um uppgjör ógreiddra gjalda við lögaðila og að jafnræði ríki á milli þeirra sem eiga vangreidd gjöld við sveitarfélagið um uppgjör þeirra. Samgöngu- og sveitarstjórnarráðuneytið telur því ekki tilefni til formlegrar stjórnsýsluúttektar og er málinu lokið af hálfu ráðuneytisins.

Héraðsdómur Norðurlands eystra hefur kveðið upp dóm í máli Sandfells ehf. á hendur Norðurþingi þar sem sveitarfélagið er sýknað af kæru stefnanda.

Til kynningar er greinargerð Umhverfisstofnunar um framkomnar athugasemdir vegna fyrirhugaðrar friðlýsingar vatnasviðs Jökulsár á fjöllum.

Kolviður óskaði með bréfi dags. 11. apríl 2018 eftir hugmynd að um 100 ha landi við Húsavík til gróðursetningar á Kolviðarskógi. Kolviður er sjóður sem miðar að því að binda kolefni í gróðri og jarðvegi í þeim tilgangi að draga úr styrk koldíoxíðs í andrúmslofti. Nokkur umfjöllun hefur verið um málið í nefndum Norðurþings, síðast í skipulags- og framkvæmdaráði 18. desember s.l. Nokkrar hugmyndir hafa komið upp með staðsetningu svæðis og helst virðist koma til greina 1. Land beggja vegna vegar upp á Húsavíkurfjall og allt norður að vegi upp að Skurðsbrúnanámu. 2. Land beggja vegna Reykjaheiðarvegar í ofanverðri Grásteinsheiði og 3. Óráðstafað land á Ærvíkurhöfða.

Skipulags- og framkvæmdaráð leggur til við byggðaráð að Kolviði verði boðin afnot af um 100 ha landi við Ærvíkurhöfða og um 27 ha land meðfram vegi upp á Húsavíkurfjall til samræmis við fyrirliggjandi hugmyndir. Framkvæmda- og þjónustufulltrúa verði falið að teikna upp nánari hnitsetta afmörkun á því svæði sem boðið verði til ræktunar Kolviðarskógar.

Fjölskylduráð leggur til að Norðurþing setji sér eftirfarandi reglur varðandi útleigu á íþróttahúsum og félagsheimilum í sinni eigu: Norðurþing leggst gegn því að íþróttahús og félagsheimili í sinni eigu verði leigð út og notuð undir skemmtanir þar sem áfengi er haft um hönd nema að aldurstakmark sé að lágmarki 18 ára. Séu félagsheimili eða íþróttahús í umsjón rekstaraðila verði gerðir viðaukar við samninga sem tryggja að eftir þessu sé farið. Ráðið vísar málinu til byggðarráðs sem fer með samningsmál við rekstraraðila eigna Norðurþings.

Eitt tilboð hefur borist í eignina en tilboðsfrestur rann út á hádegi 10. júlí.