Byggðarráð Norðurþings

Fjármálastjóri fer yfir þróun og stöðu skatttekna Norðurþings árið 2017.

Fjármálastjóri fer yfir stöðuna á fjárhagsáætlunarvinnu fyrir árið 2018. Stefnt er að því að byggðarráð vísi fjárhagsáætlun Norðurþings til fyrri umræðu á næsta fundi sveitarstjórnar 31. október. Farið verður yfir áætlanir stærstu málaflokkanna og drög að framkvæmdaáætlun 2018-2021.

Velferðarráðuneytið sendi út tilkynningu 17.10.2017 hvar kom fram ný áætlun heilbrigðisráðherra um byggingu 155 hjúkrunarrýma til ársins 2022 til viðbótar þeim 313 rýmum sem þegar eru á framkvæmdastigi samkvæmt eldri framkvæmdaáætlun. Alls munu því verða byggð eða endurgerð 468 hjúkrunarrými á tímabilinu ýmist til fjölgunar rýma eða til að bæta aðbúnað.

Alþingi samþykkti í júní síðastliðnum nýja fjármálaáætlun til næstu fimm ára. Með henni skapaðist svigrúm til aukinnar uppbyggingar hjúkrunarrýma sem áætlun heilbrigðisráðherra miðast við.

Á höfuðborgarsvæðinu verður hjúkrunarrýmum fjölgað um 80 umfram gildandi áætlun og um 10 í Árborg. Uppbygging miðar einnig að því að bæta aðbúnað íbúa á nokkrum hjúkrunarheimilum þar sem þörf er á að færa aðbúnaðinn til nútímalegs horfs, í samræmi við viðmið velferðarráðuneytisins um skipulag hjúkrunarheimila. Áætlað er að byggja 23 rými á Húsavík, 24 á Höfn í Hornafirði og endurgera 18 hjúkrunarrými í Stykkishólmi.

Áform um fjölgun rýma byggist á mati velferðarráðuneytisins á því hvar þörfin er mest og taka mið af fjárhagslegu svigrúmi gildandi fjármálaáætlunar. Áætlaður heildarkostnaður við uppbyggingu 155 hjúkrunarrýma er tæpir fimm milljarðar króna. Í áætluninni er miðað við lágmarksþátttöku hlutaðeigandi sveitarfélaga í framkvæmdakostnaðinum, þ.e. 15% á móti 85% kostnaði ríkissjóðs.

Félag eldri borgara á Húsavík óskar eftir styrk að fjárhæð fimm milljónir til að fjármagna lokaátak framkvæmda við húsnæði félagsins að Garðarsbraut 44.

Um áramótin lýkur verkefninu Brothættar byggðir - Raufarhöfn og framtíðin með formlegum hætti. Eftir stendur ákvörðun sveitarstjórnar um framtíð verkefnisins á vegum sveitarfélagsins og hvernig unnið verði með þann árangur sem náðst hefur með verkefninu.

https://www.byggdastofnun.is/is/brothaettar-byggdir/raufarhofn

Fjarskiptasjóður mun úthluta 450 m.kr. til uppbyggingar sveitarfélaga á ljósleiðarakerfum árið 2018 líkt og sjóðurinn gerði vegna uppbyggingar þeirra árin 2016 og 2017. Í ljósi þess að fjárhagur og aðstæður sveitarfélaga er mismunandi hefur verið ákveðið að styrkja samkeppnisstöðu tiltekinna sveitarfélaga gagnvart umsóknum í samkeppnispott fjarskiptasjóðs vegna 2018. Sérstökum 100 m.kr. byggðastyrk er varið til þessa verkefnis.

Byggðastyrknum er skipt í tvo hluta að þessu sinni. Annars vegar er 10 m.kr. úthlutað beint til tiltekinna
"brothættra byggða" og hins vegar er 90 m.kr. úthlutað samkvæmt aðferð sem hér er útlistuð. Notast er við
vog við samanburðarmat á aðstæðum í sveitarfélögum og fjárfestingargetu þeirra. Sveitarfélög fá þannig
einkunn eða stig í samræmi við innbyrðis uppröðun þeirra á grundvelli töflu 1. Sveitarfélög sem fá fæst
samanlögð stig lenda efst í forgangsröðun gagnvart byggðastyrknum. Þau sveitarfélög sem lenda efst í
forgangsröðun hljóta þannig byggðastyrk vegna 2018.

Alls hlýtur sveitarfélagið Norðurþing styrk að upphæð 9,9 mkr. Hlutfallslega er það skv. útreiknuðum byggðastyrk 6,4 mkr og til brothættra byggða 3,5 mkr.

Frá 1. janúar 1997 hefur verið í gildi ákvæði til bráðabirgða við lög um gatnagerðargjald um heimild sveitarfélaga til að leggja á B-gatnagerðargjald vegna gatna sem voru enn ómalbikaðar á þeim tíma. Þetta bráðabirgðaákvæði hefur ítrekað verið framlengt en nú, 20 árum eftir samþykkt þess liggur fyrir að það lögin falli úr gildi um næstu áramót.

Markaðsstofa Norðurlands óskar eftir því að sveitarfélagið taki þátt í umsókn um að fá einkaleyfi á vörumerkinu Arctic Coast Way. Að sveitarfélagið styðji heils hugar við framtakið og telji einkaleyfið mikilvægt til þess að byggja upp öflugri ferðaþjónustu í sveitarfélaginu. Markmiðið er að vörumerkið Arctic Coast Way verði styrkur fyrir Norðurþing sjálft, ferðaþjónustufyrirtæki og aðra tengda aðila innan sveitarfélagsins hvað varðar atvinnuuppbyggingu til framtíðar.

Fyrir liggur tillaga frá Skútustaðahreppi og Þingeyjarsveit að skipan í fagráð Náttúrurannsóknarstöðvarinnar á Mýtvatni. Lagt er til að tilnefna Arnheiði Rán Almarsdóttur líftækni og Dr. Helga Arnar Alfreðsson jarðefnafræðing í fagráðið fyrir hönd sveitarfélaganna þriggja til setu í ráðinu.

Forsvarsmenn Golfklúbbs Húsavíkur hafa fundað með sveitarstjóra nýverið og kynnt hugmyndir klúbbsins að uppbygging og framtíðarsýn félagsins. Sú sýn er afar metnaðarfull og lýsir áhuga golfklúbbsins á því að byggja upp nýja og glæsilega aðstöðu fyrir gesti Katlavallar, austan Þorvaldsstaðarár, á nýjum stað til samræmis við deiliskipulag á svæðinu. Sveitarstjóri fer yfir stöðu viðræðna og hugmyndir golfklúbbsins með hvaða hætti þau sjá fyrir sér að taka næstu skref í málinu.

Framkvæmdasjóðurinn styrkir framkvæmdir sveitarfélaga og einkaaðila á ferðamannastöðum sem: a) Stuðla að náttúruvernd.
b) Auka öryggi ferðamanna. c) Bæta úr skorti á nauðsynlegum innviðum. d) Framkvæmdum sem búa til nýja ferðamannasegla/staði á „köldum“ svæðum eða árstímum. e) Undirbúning og hönnun fyrir ofangreint.

Umsóknarfrestur er til 25. október n.k. og áætlar Norðurþing að senda inn umsóknir fyrir brýn verkefni í sveitarfélaginu.

Fyrir byggðarráði liggur fundargerð 195. fundar heilbrigðisnefndar norðurlandssvæðis eystra.