Byggðarráð Norðurþings

Norðurþing var eins og undanfarin ár þátttakandi í árlegum spurningavagni Gallup um þjónustu sveitarfélaga á Íslandi. Könnunin fór fram í nóvember og desember 2019 og liggja niðurstöður nú fyrir byggðarráði.

Með erindum Guðbjarts Ellerts Jónssonar, sveitarstjórnarmanns í Norðurþingi dagsett 20. desember 2018 og Daníels Isebarn Ágústssonar lögmanns, f.h. Gentle Giants-Hvalaferðir ehf. dagsett 21. janúar 2019, var óskað eftir að samgöngu- og sveitarstjórnarráðuneytið tæki stjórnsýslu sveitarfélagsins Norðurþings til formlegrar umfjöllunar sbr. 109. og 112. gr. sveitarstjórnarlaga nr. 138/2011. Fólu erindin m.a. í sér kvörtun vegna samkomulags sveitarfélagsins við hvalaskoðunarfyrirtækið Norðursiglingu ehf. um uppgjör á greiðslu farþegagjalda á tímabilinu 2015-2018. Óskaði ráðuneytið eftir umsögn sveitarfélagsins vegna málsins ásamt því að kvartendum var veitt færi á að veita sína umsögn um skýringar sveitarfélagsins.
Lauk málinu með tveimur bréfum ráðuneytisins dagsettum 26. júní 2019. Taldi ráðuneytið að ekki væri nægilegt tilefni til að taka stjórnsýslu sveitarfélagsins er varðaði umrætt samkomulag, til formlegrar umfjöllunar, sbr. 112. gr. sveitarstjórnarlaga.
Með erindi umboðsmanns Alþingis til samgöngu- og sveitarstjórnarráðuneytisins þann 25. október sl. óskaði umboðsmaður eftir frekari skýringum á tilteknum atriðum í niðurstöðu ráðuneytisins. Ráðuneytið hefur nú tekið umrætt mál aftur til umfjöllunar og telur ekki ástæðu til að taka stjórnsýslu sveitarfélagsins til frekari umfjöllunar og telst málinu því lokið af hálfu ráðuneytisins.

Fyrir byggðarráði liggja drög að greinargerð SSNE, sem unnin er upp úr gögnum frá sveitarfélögum á starfssvæði samtakanna, vegna aftakaveðurs sem gekk yfir Norðurland eystra 10. - 12. desember 2019.

Fyrir byggðarráði liggur erindi Bakkakróks ehf. varðandi lóðina að Bakkavegi 4. Annars vegar er um að ræða ósk um breytingu á nýtingarhlutfalli lóðarinnar og hins vegar er óskað eftir fundi til að gera samkomulag um lagningu bráðabirgðavegar inn á lóðina, væntanlega frá núverandi vegi að verksmiðju PCC og áfram í vestur.

Til umræðu í byggðarráði er staða og þróun úthlutunar byggðarkvóta í sveitarfélaginu. Fyrir liggur að framtíð byggðarkvótakerfisins verður rædd á alþingi á næstunni í tengslum við skýrslu starfshóps sjávarútvegs- og landbúnaðarráðherra um endurskoðun á byggðakvótakerfinu. Til grundvallar umræðunni er skýrsla starfshópsins.

Fyrir byggðarráði liggur tilkynning Samtaka sveitarfélaga og atvinnuþróunar á Norðurlandi eystra, SSNE um ráðningu Eyþórs Björnssonar í stöðu framkvæmdastjóra samtakanna.

Fyrir byggðarráði liggur erindi Byggðastofnunar varðandi smíði gagnvirks yfirlitskorts með upplýsingum um aðgengi landsmanna að almennri þjónustu á vegum bæði stjórnvalda og einkaaðila. Markmiðið er að upplýsingar um þá þjónustu sem er fyrir hendi um land allt verði aðgengilegri og áreiðanlegri en nú er.
Norðurþingi býðst samstarf í verkefninu án endurgjalds.

Fyrir byggðarráði liggur erindi frá SSNE vegna byggðaáætlunar-náttúruvernd og efling byggða. SSNE óskar eftir hugmyndum að mögulegum verkefnum sem falla undir þann lið byggðaáætlunarinnar.

Húsnæðis- og mannvirkjastofnun minnir á að skila skuli uppfærðum húnæðisáætlunum til stofnunarinnar eigi síðar en 1. mars ár hvert. Stofnunin bendir á að þörf sé á uppfærslu eða viðbótum á upplýsingum um framboð leiguhúsnæðis og stöðu biðlista eftir leiguhúsnæði í eigu sveitarfélagsins og að fara þurfi heildstætt yfir húsnæðisáætlunina og uppfæra þær upplýsingar sem hafa tekið breytingum frá síðustu útgáfu.

Þekkingarnet Þingeyinga hefur gefið út þrjár skýrslur sem hagnýta má til grundvallar stefnumörkun og ákvarðanatöku á ýmsum sviðum. Skýrslurnar eru; samantekt á mannfjöldaþróun í Þingeyjarsýslum á tímabilinu 2010-2019, niðurstöður viðhorfsrannsóknar um búsetugæði í Þingeyjarsýslum árið 2018 og samanburður við hliðstæða könnun frá 2009 og sú þriðja fjallar um niðurstöður rannsóknar um svæðisbundna stýringu hafsvæða með Skjálfanda sem raundæmi.
Þekkingarnetið býður upp á frekari kynningar á þessum skýrslum ef áhugi er á.

Fyrir byggðarráði liggur til upplýsingar og kynningar skýrsla Héraðssambands Þingeyinga um starf og stöðu HSÞ og aðildarfélaga þess. Í skýrslunni er farið yfir stöðu og starf aðildarfélaganna ásamt þeim tækifærum og ógnunum sem eru innan héraðs. Þar koma fram ýmsir þættir sem HSÞ telur að hægt sé að bæta með sameiginlegu átaki og þannig bæta heildarstarf íþrótta- og ungmennafélaga á svæðinu.

Fyrir byggðarráði liggur bréf frá Brú lífeyrissjóði varðandi endurgreiðsluhlutfall vegna réttindasafns Lífeyrissjóðs starfsmanna Húsavíkurkaupstaðar. Einnig er meðfylgjandi bréf tryggingarstærðfræðings þar sem tilkynnt er að niðurstaða hans sé að nauðsynlegt sé að hækka endurgreiðsluhlutfallið úr 0,69 í 0,71.
Samkvæmt samþykktum sjóðsins þarf sveitarstjórn að ákveða endurgreiðsluhlutfallið að fenginni tillögu tryggingastærðfræðings og sjóðsstjórnar.

Aðalfundur Húsavíkurstofu verður haldinn 4. febrúar næstkomandi. Norðurþing hefur undanfarið ár haft tvo fulltrúa í stjórn, þau Silju Jóhannesdóttur og Berg Elías Ágústsson. Byggðaráð þarf að taka afstöðu til þess hvaða fulltrúar sitji fyrir hönd sveitarfélagsins í stjórn Húsavíkurstofu 2020-2021.

Boðað er til aðalfundar Norðurhjara fimmtudagskvöldið 6. febrúar nk. kl. 20:00 í Gistihúsinu Grásteini.

Fyrir byggðarráði liggur fundargerð 11. fundar stjórnar Dvalarheimilis aldraðra sf. frá 22. janúar sl.

Fyrir byggðarráði liggur fundargerð hverfisráðs Reykjahverfis frá 9. desember 2019.

Sýslumaðurinn á Norðurlandi eystra óskar eftir umsögn sveitarfélagsins vegna umsóknar þorrablótsnefndar Raufarhafnar um tækifærisleyfi í tilefni þorrablóts í Hnitbjörgum frá kl. 23:00 þann 8. febrúar til kl. 03:00 þann 9. febrúar.

Karlakórinn Hreimur óskar eftir framlagi í formi kaupa á auglýsingu eða styrktarlínu í söngskrá ársins 2020.

Samband íslenskra sveitarfélaga boðar til XXXV. landsþings Sambandsins þann 26. mars nk.

Velferðarnefnd Alþingis óskar eftir umsögn um frumvarp til laga um breytingu á lögum um málefni innflytjenda, nr. 116/2012, með síðari breytingum (móttaka flóttafólks og innflytjendaráð), 457. mál.
Þess er óskað að undirrituð umsögn berist eigi síðar en 14. febrúar nk.