Byggðarráð Norðurþings

Borist hefur bréf frá Fyrirtækjaskrá Skattsins vegna skráningar á raunverulegum eigendum félagsins; Tún, tómstunda- og menningarhús. Engin stofngögn finnast um félagið né yfirlit yfir rekstur þess. Fyrirtækjaskrá Skattsins mælir með að félaginu verði slitið.

Á fundi fjölskylduráðs þann 24. febrúar sl. var tekið fyrir erindi frá UMF Austra vegna kaupa á tækjum í íþróttamiðstöðina á Raufarhöfn. Óskað var eftir framlagi á móti framlagi Austra.
Fjölskylduráð vísaði erindinu til skipulags- og framkvæmdarráðs.
Á fundi skipulags- og framkvæmdaráðs þann 10. mars sl. var erindið tekið fyrir og bókaði ráðið;
Skipulags- og framkvæmdaráð vísar styrkbeiðninni til byggðaráðs.

Styrktarsjóður EBÍ var stofnaður árið 1996 og er tilgangur sjóðsins að styrkja með fjárframlögum sérstakar athuganir eða rannsóknir á ýmsum þróunarþáttum í atvinnulífi, samgöngum, fræðslu- og menningarmálum í aðildarsveitarfélögum. Sveitarfélaginu er hér með boðið að senda inn umsókn um stuðning við verkefni vegna sérstakra framfaraverkefna á vegum þess. Umsóknarfrestur er til aprílloka.

Fyrir byggðarráði liggur fundargerð aðalfundar Skúlagarðs - fasteignafélags frá 12. mars sl.

Fyrir byggðarráði liggur fundargerð 7. fundar stjórnar SSNE frá 11. mars sl.

Fyrir byggðarráði liggja fundargerðir stjórnar Markaðsstofu Norðurlands frá 16. og 18 mars sl. ásamt upplýsingum um stöðu ferðaþjónustunnar á Norðurlandi.

Í október 2018 skipaði forseti Alþingis starfshóp um endurskoðun kosningalaga til að fara yfir fyrri tillögur um efnið með tilliti til hagkvæmni og skilvirkni. Jafnhliða skyldi starfshópurinn kanna kosti þess að setja heildarlöggjöf um framkvæmd allra almennra kosninga og skoða eftir því sem tími og aðstæður leyfa kosti rafrænnar kjörskrár. Í starfshópnum sitja fulltrúar landskjörstjórnar, dómsmálaráðuneytisins, Sambands íslenskra sveitarfélaga og Þjóðskrár Íslands auk fulltrúa forseta Alþingis.

Starfshópurinn hefur nú útbúið drög að frumvarpi til kosningalaga sem lögð hafa verið á vef Alþingis í opið samráð. Lagt er til að lögin gildi um kosningar til Alþingis og sveitarstjórna, um framboð og kjör forseta Íslands og um framkvæmd þjóðaratkvæðagreiðslna. Markmið frumvarpsins er að styrkja lýðræði með því að viðhalda trausti á framkvæmd kosninga og tryggja að beinar, frjálsar og leynilegar kosningar séu haldnar reglulega. Meginefni frumvarpsins lúta að breyttri stjórnsýslu kosninga og einföldun regluverks.

Tekið er á móti umsögnum og ábendingum á netfangið kosningalog@althingi.is til 8. apríl nk. Að loknu samráðsferli mun starfshópurinn fara yfir athugasemdir sem berast og í kjölfarið skila forseta Alþingis fullbúnu frumvarpi.

Á 100. fundi sveitarstjórnar Norðurþings þann 12. mars síðastliðinn var samþykkt að stofna aðgerðahóp á vegum Norðurþings til að fást við efnahagsmál vegna Covid-19. Hópurinn hefur komið saman til þriggja funda undanfarna viku og liggja fyrir byggðarráði fundargerðir hópsins ásamt vinnugögnum vegna mögulegra sviðsmynda í rekstri sveitarfélagsins á árinu. Sömuleiðis liggur fyrir erindi frá Sambandi íslenskra sveitarfélaga frá 19. mars sl. þar sem hvatt er til að hrinda í framkvæmd eins og kostur er hugmyndum og ábendingum að aðgerðum til viðspyrnu fyrir íslenskt atvinnulíf og fjölskyldur í ljósi þess samdráttar sem blasir við í þjóðarbúskapnum.