Byggðarráð Norðurþings

Á fund byggðarráðs kemur Lilja Berglind Rögnvaldsdóttir frá Þekkingarneti Þingeyinga og fer yfir niðurstöður íbúakönnunnar um húsnæðismál á Kópaskeri og við Öxarfjörð.

Fyrir byggðarráði liggja drög að fjárhagsrömmum vegna fjárhagsáætlunar 2022.

Þriðjudaginn 14. september sl. voru áfangaskýrslu um uppbygging grænna iðngarða á Íslandi gerð skil með upplýsingafundi í Hörpu. Norðurþing hefur unnið að verkefninu í samstarfi við atvinnuvega- og nýsköpunarráðuneytið, Íslandsstofu og Landsvirkjun. Fram kom á fundinum að verðmæt tækifæri eru fólgin í uppsetningu grænna iðngarða á Íslandi, t.a.m. á Bakka við Húsavík. Undanfarna mánuði hafa aðilar úr ýmsum áttum unnið að kortlagningu tækifærianna og hvar helstu sóknarfærin liggja.

Áfangaskýrslan sem kynnt var og liggur hér til kynningar í byggðarráði er leiðarvísir fyrir næstu skref um það hvernig efla má atvinnulífið, auka samkeppnishæfni Íslands og treysta byggð á landsbyggðinni með uppbyggingu grænna iðngarða.

Í kjölfar funda forsvarsmanna sveitarfélagsins og fulltrúa GREEN FUEL ehf. hefur byggðarráði nú borist formleg ósk þess efnis að samstarf verið hafið um vinnu við gerð sameiginlegrar viljayfirlýsingar beggja aðila um uppbygging vetnis- og ammoníakframleiðslu fyrirtækisins, innan iðnaðarsvæðisins á Bakka við Húsavík.

Sveitarstjóri gerir grein fyrir fundi sínum með ráðherra um málið. Von er á formlegri afstöðu ráðherra til áskorunarinnar á allra næstu dögum.

Fyrir byggðarráði liggja tilnefningar og framboð til setu í hverfisráðum sveitarfélagsins. Byggðarráð skipar í ráðin til tveggja ára í senn. Sveitarstjóri gerir grein fyrir fundi sínum við formenn fráfarandi hverfisráða og starfsmenn ráðanna á Kópaskeri og Raufarhöfn.

Á 371. fundi byggðarráðs var bókað;
Byggðarráð fór vandlega yfir málið og er enn áhugasamt um að hægt verði að koma upp safnarekstri í húseigninni og mun fjalla um málið aftur á næsta fundi þar sem endanleg afstaða verður tekin til erindisins

Sveitarstjóri gerir grein fyrir fundum og framgangi formunar nýs uppbyggingar samnings við GH.

Borist hefur erindi frá Orkustofnun þar sem óskað er umsagnar sveitarfélagsins vegna umsóknar um nýtingarleyfi á jarðhita við Skógalón í Öxarfirði.

Á 105. fundi skipulags- og framkvæmdaráðs var bókað;
Skipulags- og framkvæmdaráð samþykkir framlagðan viðauka sem ekki felur í sér nein fjárhagsleg áhrif á rekstur og vísar honum til samþykktar í byggðarráði.

Fyrir byggðarráði liggur viðauki við fjárhagsáætlun 2021 vegna málaflokks 11. Viðaukinn er vegna tilfærslu á milli launa og annars rekstrarkostnaðar að fjárhæð 2.537.116 kr.

Fyrir byggðarráði liggja drög að framlengingu á samningi við Advania um kaup á hugbúnaðarþjónustu. Samningurinn er til sex mánaða og gildir til 30. júní 2022.

Boðað er til aðalfundar Fjárfestingafélags Þingeyinga 23. september nk. kl. 14:00 á Fosshótel Húsavík.

Borist hefur eftirfarandi upplýsingapóstur frá umhverfis- og auðlindaráðuneytinu;

Bernarsamningurinn um vernd villtra plantna, dýra og lífsvæða þeirra í Evrópu tók gildi 1982. Samningurinn er fyrsti alþjóðasáttmálinn sem fjallar í senn um verndun tegunda og búsvæða þeirra. Meginmarkmið samningsins er að vernda evrópskar tegundir villtra plantna og dýra og vistgerða sem þarfnast verndar.

Ísland gerðist aðili að samningnum 1993. Eins og meðal annarra aðildarríkja samningsins er samningurinn grunnur að náttúruverndarlöggjöf Íslands. Til að fylgja eftir markmiðum sínum um þá vernd sem samningurinn tiltekur geta ríki gert tillögu að svæðum í svokallað Emerald Network. Markmiðið með Emerald Networker að mynda net verndarsvæða í Evrópu þar sem unnið er að vernd valinna villtra plantna, dýra og lífsvæða. Ríki geta lagt inn tillögur að fjölda svæða í einu eða ákveðið að gera það í skrefum og gera tillögu að nokkrum svæðum í einu.

Þegar svæði verða hluti af Emerald Network eru gerðar kröfur um lagalega vernd og umsjón svæðanna, sem og vöktun og áætlanir um hvernig vernd og stjórnun verði háttað.

Ákveðið hefur verið að taka fyrsta skrefið í að tilnefna svæði á Íslandi í Emerald Network.

Svæðin sem um ræðir njóta nú þegar verndar samkvæmt íslenskum lögum og uppfylla þau því kröfur um lagalega vernd og umsjón.

Svæðin eru:

- Guðlaugstungur
- Vatnajökulsþjóðgarður
- Verndarsvæði Mývatns og Laxár
- Vestmannsvatn
- Þjórsárver

Svæðin hafa verið valin því þau eru þegar undir formlegri vernd sem friðlönd/þjóðgarður/verndarsvæði skv. lögum og vegna þess að þar eru tegundir eða lífsvæði sem mikilvægt er að vernda samkvæmt Bernarsamningnum. Sem dæmi má nefna vistgerðirnar rústamýravist í Þjórsárverum og Guðlaugstungum og fjallahveravist í Vatnajökulsþjóðgarði og fuglategundirnar húsönd og flórgoða á verndarsvæði Mývatns og Laxár og Vestmannsvatni.

Með tillögunum er Ísland því að upplýsa önnur aðildarríki um að þessar plöntur, dýr og lífsvæði eru nú þegar vernduð á Íslandi og jafnframt aðtaka þátt í að vinna að framgangi markmiða samningsins.