Orkuveita Húsavíkur ohf

Á 212 fundi stjórnar OH var tekin til umræðu ósk Íslandsþara ehf. um viðræður vegna uppbyggingar innviða og orkuafhendingar í tengslum við áform félagsins um þurrkun Tröllaþara á Húsavík. Þá var stefnt að því að fá fulltrúa Íslandsþara ehf. inn á fund stjórnar OH til þess að lýsa verkefninu, m.a. með tilliti til aðkomu Orkuveitu Húsavíkur ohf.

í ljósi þeirra verkefna sem horft er til að staðsett verði á iðnaðarlóðum sunnan Húsavíkur, hefur verið óskað eftir kostnaðarmati frá verkfræðistofunni Vatnaskilum varðandi greiningu á möguleikum til aukinnar vatnstöku úr vatnsbóli Húsavíkur, austan og ofan bæjarins. Verði niðurstaða þeirrar greiningar jákvæð yrði með nokkuð hagkvæmum hætti, mögulegt að mæta fyrirsjáanlegri eftirspurn eftir neysluvatni/kælivatni að iðnaðarsvæði sunnan Húsavíkur með hækkun þrýstings í núverandi stofnlögn vatnsveitu.
Kallað er eftir afstöðu stjórnar OH til verkefnisins og hvort halda skuli áfram á þeim nótum sem þar er lagt upp með.

Í gögnum sem lögð voru fram í byggðaráði Norðurþings þann 05.11.2020 í tengslum við umræður um fjárhagsáætlun Norðurþings fyrir árið 2021, eru þær forsendur lagðar til grundvallar að vatnsgjald, annar af tveimur gjaldstofnum Orkuveitu Húsavíkur ohf. sem inneimtir eru með fasteignagjöldum sveitarfélagsins, skuli taka 50% lækkun á milli ára. Þetta er gert til þess að mæta hækkunum gjaldstofna sveitarfélagsins, t.a.m. sorphirðugjöldum.
Óskað er afstöðu stjórnar Orkuveitu Húsavíkur ohf. til umræddrar lækkunar vatnsgjalds og þeirra afleiðinga sem sú tekjuskerðing OH myndi hafa á rekstur og afkomu félagsins, en ekki síður hvernig sú aðgerð endurspeglast í nýlega samþykktri rekstrarstefnu félagsins.

"Stjórn skal við áætlanagerð á hverju ári setja félaginu markmið fyrir komandi ár, þ.á.m. um EBITDA-afkomu, eiginfjárhlutfall í lok árs, áætlaða ávöxtun eigin fjár í hverjum rekstrarþætti félagsins og hreint veltufé frá rekstri.
Stjórn skal við áætlanagerð og uppgjör aðgreina hvert rekstrarsvið (hitaveita, vatnsveita, fráveita o.s.frv.) félagsins sérstaklega.
Við áætlanagerð skal tryggt að fjárfestingarstefnu félagsins sé fylgt."

Fyrir liggur uppfærð rekstraráætlun OH fyrir árið 2021 með áorðnum breytingum vegna lækkunar vatnsgjalds A-húsnæðis úr 0,1% af fasteignamati í 0,05%

Gert er ráð fyrir í launaáætlun nefnda og ráða að laun fyrir setu í stjórn Orkuveitu Húsavíkur ohf. á árinu 2021 taki þeim breytingum sem samþykktar voru í byggðarráði þann 15. október sl.
Lagt fram til ákvörðunar í stjórn Orkuveitu Húsavíkur ohf.

Lögð fyrir stjórn OH til ákvörðunar og samþykktar eru drög að framkvæmdaáætlun Orkuveitu Húsavíkur ohf. fyrir rekstrarárið 2021.

Endurnýjunarþörf þjónustubifreiða Orkuveitu Húsavíkur ohf. er orðin nokkuð augljós og töluverð skynsemi fólgin í því að gera ráð fyrir fjármögnun vegna endurnýjunar ökutækja í fjárfestingaáætlun félagsins fyrir árið 2021.
Fyrir liggur kauptilboð frá Toyota sem stjórn OH þarf að taka afstöðu til í tengslum við fjárfestingar OH 2021.

Fyrir liggur erindi frá rekstrarstjóra Geosea ehf., Sólveigu Ásu Arnarsdóttur í tengslum við rekstur veitukerfa OH á Höfða og vaxandi vandamála vegna gasútskiljunar í veitulögn frá holu HU-01.

Óskað er afstöðu stjórnar Orkuveitu Húsavíkur ohf. til breytinga á gjaldskrá félagsins fyrir árið 2021.

https://www.oh.is/static/files/Verdskra/gjaldskra-orkuveitu-husavikur.pdf

Fyrir stjórn Orkuveitu Húsavíkur ohf. liggur tillaga að endurskoðaðri og einfaldaðri gjaldskrá rotþróargjalda í Norðurþingi. Gjaldskránni er ætlað að endurspegla raunkostnað OH vegna tæmingar rotþróa í sveitarfélaginu og tekur mið af þeim verðum sem innheimt eru hjá hreinsunaraðila.

Til skoðunar hefur verið, í tengslum við fjárhagsáætlunarvinnu samstæðu Norðurþings, hvort hagkvæmt eða æskilegt sé að Orkuveita Húsavíkur ohf. greiði arð til eigenda sinna á næsta ári. Fyrir stjórn Orkuveitu Húsavíkur ohf. liggur að meta möguleikann á því og þá jafnframt hvaða fjárhæð væri þá um að ræða.