Byggðarráð Norðurþings

Til fundar byggðarráðs mæta fulltrúar í aðgerðahópi Húsavíkurstofu sem hafa til umræðu stöðuna í ferðaþjónustu á Húsavík í ljósi Covid-19.

Á undangengnum árum hefur verið ráðist í mjög umfangsmiklar innviðafjárfestingar sem stutt hafa við atvinnuuppbyggingu á svæðinu og hafa þær framkvæmdir eflt mjög samkeppnishæfni sveitarfélagsins. Þar má helst telja framkvæmdir við höfnina á Húsavík, jarðgangagerð um Húsavíkurhöfðagöng, orkuinniviðir hafa verið byggðir upp með gufuaflsvirkjun á Þeistareykjum og tenging raforkuflutningskerfisins milli Þeistareykja og Bakka eru allt þættir sem setja iðnaðarsvæðið raunverulega á kortið m.t.t. nýrrar/aukinnar framleiðslu á Íslandi.

Svæðið allt styður mjög vel við frekari atvinnuuppbyggingu og Bakki meðal fremstu svæða á landsvísu til að hýsa fjölbreyttan iðnað. Einnig er spennandi að horfa til þess hvort sérstök tækifæri geti falist í samspili og samstarfi PCC BakkiSilicon hf. og annarra fyrirtækja með það markmið að styrkja svæðið í anda hringrásarhagkerfisins.

Norðurþing, Landsvirkjun, PCC BakkiSilicon og fleiri hafa sameiginlegan hag af því að vinna náið saman til þess að Bakki haldi áfram að vaxa og dafna sem atvinnusvæði sem geti tekið á móti atvinnutækifærum sem byggja t.a.m. á sjálfbærri orkunýtingu. Þar eru hagsmunir Landsvirkjunar ríkir og hefur fyrirtækið þekkingu, mannafla og getu í að styðja við sveitarfélagið í frekari þróun Bakkaverkefnisins. Í því samhengi er nauðsynlegt að þróa skýra framtíðarsýn fyrir svæðið, greina enn betur tækifærin og skipuleggja sókn sem byggir á styrkleikum svæðisins og framtíðarsýn sveitarfélagsins í atvinnumálum í ljósi aukinna krafna um græna og loftslagsvæna starfsemi.

Sveitarstjóri óskar eftir umboði byggðarráðs til þess að leita til Landsvirkjunar og PCC BakkiSilicon um sérstakt samstarf samkvæmt ofangreindu. Í samstarfinu væri lögð sérstök áhersla á að sækja fram á grunni sjálfbærni og umhverfisvænnar starfsemi á Bakka.

Samantekt um úrvinnslu umsókna sérstakra sumarstarfa vegna Covid-19 áhrifa er til umræðu í byggðarráði. Minnisblað með samantekt skrifstofu- og skjalastjóra lagt fram til kynningar.

Á 329. fundi byggðarráðs var til umræðu staðan á verkefninu Öxarfjörður í sókn.
Á fundi ráðsins var bókað;
Umræðum verður fram haldið á næsta fundi byggðarráðs og sveitarstjóra falið að taka saman minnisblað um stöðu verkefnisins.

Á 328. fundi byggðarráðs var tekið fyrir erindi tveggja aðila sem óskað hafa eftir niðurfellingu sorphirðugjalda á þeim grunni að sorphirða sé keypt beint af rekstraraðila sorphirðu í Norðurþingi.
Á fundinum var bókað;
Byggðarráð felur sveitarstjóra að taka saman minnisblað og leggja fyrir ráðið að viku liðinni.

Skjöl lögð til kynningar er varða uppfærslu á samningum (e. direct agreements) Norðurþings og Hafnasjóðs Norðurþings annarsvegar, við PCC BakkiSilicon og KfW bankann í Þýskalandi hinsvegar.

Borist hefur erindi frá Örlygi Hnefli Jónssyni vegna framkvæmda við Höfða á árinu 2018 og innheimtuaðgerða vegna ógreiddra orkureikninga.
Í erindinu er gerður áskilnaður um að leita til Úrskurðarnefndar upplýsingamála um að öll gögn og fundargerðir verði afhent og að einnig verði leitað til Samgöngu- og sveitarstjórnarráðuneytisins sem og Umboðsmanns Alþingis vegna framgangs við stjórnun verkefnisins af hálfu Norðurþings og Orkuveitu Húsavíkur ohf.

Fyrir byggðarráði liggur yfirlit yfir rekstur sveitarfélagsins á tímabilinu janúar til apríl 2020.

Fyrir byggðarráði liggur bréf Samgöngu- og sveitarstjórnarráðuneytisins vegna áhrifa COVID-19 á opinber fjármál. Ráðuneytið hefur óskað eftir upplýsingum um fjármál sveitarfélaga og er óskað eftir að verkefnið sé í forgangi svo tryggt verði að skýr yfirsýn fáist um stöðu einstakra sveitarfélaga sem fyrst.

Fyrir byggðarráði liggur viðaukabeiðni vegna málaflokks 07-Brunamál og almannavarnir vegna launa í tengslum við COVID-19.
Á fund byggðarráðs kemur Grímur Kárason slökkviliðsstjóri og fer yfir viðaukabeiðnina.

Á 66. fundi fjölskylduráðs var bókað;

Fjölskylduráð óskar eftir viðauka við byggðarráð vegna fjárhagsáætlunar grunnskóla Raufarhafnar að fjárhæð 9.297.215 kr.

Fjölskylduráð óskar eftir viðauka við byggðarráð vegna fjárhagsáætlunar leikskóla Grænuvalla og mötuneytis Borgarhólsskóla að fjárhæð 5.263.700 kr.

Fjölskylduráð óskar eftir viðauka við byggðarráð vegna fjárhagsáætlunar leikskólans Grænuvalla að fjárhæð 18.000.000 kr.

Fjölskylduráð óskar eftir viðauka við byggðarráð vegna fjárhagsáætlunar Grænuvalla og mötuneytis Borgarhólsskóla vegna lækkunar að fjárhæð 1.500.000 kr. og óskar einnig eftir heimild til tilfærslu á milli sviða.

Á 66. fundi fjölskylduráðs var bókað;

Fjölskylduráð vísar viðauka við fjárhagsáætlun íþrótta- og tómstundasviðs (06)til byggðarráðs að upphæð 2.500.000 kr.

Fjölskylduráð vísar viðauka við fjárhagsáætlun íþrótta- og tómstundasviðs (06)til byggðarráðs að upphæð 1.500.000 kr. og óskar eftir heimild við tilfærslu fjarmagns á milli sviða.

Fyrir byggðarráði liggja drög að vinnuáætlun vegna fjárhagsáætlunar 2021.

Menningardaganefnd Raufarhafnar óskar eftir 250.000 króna styrk til að halda Menningardaga á Raufarhöfn í október 2020.

Boðað er til ársfundar Stapa lífeyrissjóðs árið 2020 þriðjudaginn 30. júní nk. í Menningarhúsinu Hofi, Akureyri.

Boðað er til aðalfundar Lánasjóðs sveitarfélaga föstudaginn 12. júní nk. á Grand Hótel Reykjavík.

Fyrir byggðarráði liggur fundargerð 4. fundar Hverfisráðs Öxarfjarðar þann 20. maí sl.

Fyrir byggðarráði liggur 3. tbl. fréttabréfs SSNE í maí 2020.

Fyrir byggðarráði liggur fundargerð 10. fundar stjórnar SSNE frá 2. júní sl.

Fyrir byggðarráði liggur fundargerð 8. fundar stjórnar Atvinnuþróunarfélags Þingeyinga hf. frá 29. apríl sl.