Byggðarráð Norðurþings

Á fund byggðarráðs koma Gunnlaugur Stefánsson og Karl Hannes Sigurðsson frá Golfklúbbi Húsavíkur og ræða uppbyggingarsamning Golfklúbbs Húsavíkur.

Bergur Elías Ágústsson óskar eftir umræðu um Húsavíkurflugvöll sem og Reykjavíkurflugvöll og mikilvægi hans er varðar áætlunar- og sjúkraflug fyrir íbúa Þingeyjarsýslu.

Greinargerð;

Eftir að Húsavíkurflugvöllur var aftur tekinn í notkun ætti öllum að vera ljóst um mikilvægi hans og þeirra lífsgæða sem starfsemi hans hafa fylgt. Núverandi rekstraraðili - Flugfélagið Ernir hafa staðið sig með miklum sóma og þjónustað svæðið af stakri príði svo eftir hefur verið tekið. Þess er óskað að forsvarsmenn Flugfélagsins Ernis mæti á fundinn og fari yfir stöðu mála.


Á fund byggðarráðs í gegnum Teams fjarfundabúnað koma Hörður Guðmundsson og Ásgeir Örn Þorsteinsson frá flugfélaginu Erni og ræða stöðu flugmála í Þingeyjarsýslu.

Á 67. fundi fjölskylduráð var bókað;

Fjölskylduráð samþykkir fyrirliggjandi drög að endurskoðari skólastefnu Norðurþings og innleiðingaráætlun hennar og vísar því til samþykktar í sveitarstjórn.

Ráðið vill þakka starfshópnum sem vann að stefnuni kærlega fyrir þeirra störf sem og þeim íbúum sem tóku þátt í vinnunni við að móta stefnuna.

Á 328. fundi byggðarráðs var m.a. eftirfarandi bókað:

Byggðarráð vísar erindi Húsavíkurstofu um skapandi sumarstarf og tilboð í sundlaugar sveitarfélagsins til umfjöllunar í fjölskylduráði.

Á 66. fundi fjölskylduráðs var bókað:

Fjölskylduráð þakkar fyrir erindið en vinnu við skipulagningu vinnuskólans er að mestu lokið og óljóst er hvort að verkefnið rúmist innan áætlunar vinnuskólans þetta sumarið.
Ef svigrúm skapast þá er íþrótta- og tómstundafulltrúi falið að vera í sambandi við forsvarsmenn Húsavíkurstofu.


Húsavíkurstofa óskar eftir að fá að bjóða upp á 2 fyrir 1 í sundlaug Húsavíkur helgarnar í júní í tengslum við kynningu á Húsavík.

Aðaltekjur sundlaugarinnar koma yfir sumarmánuðina og þar sem fjöldatakmarkanir vegna COVID-19 eru enn í gildi sér ráðið ekki fært um að samþykkja erindið

Borist hefur erindi frá Arnari Sigurðssyni vegna sölu á fiskiskipinu Vin ÞH 73 og óskar seljandi eftir staðfestingu sveitarfélagsins á því hvort það hyggist nýta forkaupsrétt sinn að skipinu.

Fyrir byggðarráði liggur til staðfestingar samningur Norðurþings við Íslenska Gámafélagið ehf. vegna söfnunar, flutnings, afsetningar og endurvinnslu úrgangs ásamt rekstri móttökustöðvar á Húsavík fyrir sveitarfélagið Norðurþing 2020-2024. Samningurinn byggir m.a. á útboðs- og verklýsingu verks dagsett í janúar 2020 og tilboði verktaka frá 29. febrúar 2020.

Á 71. fundi skipulags- og framkvæmdaráðs var bókað;

Skipulags- og framkvæmdaráð leggur til við byggðaráð, í sumarleyfisumboði sveitarstjórnar, að afmörkun lóðarinnar verði samþykkt sem og útskipti hennar úr jörðinni Núpi. Ennfremur samþykkir ráðið lóðarheitið Núpsmýri.

Á 71. fundi skipulags- og framkvæmdaráðs var bókað;

Skipulags- og framkvæmdaráð leggur til við byggðaráð, í sumarleyfisumboði sveitarstjórnar, að afmörkun lóðarinnar verði samþykkt. Ennfremur samþykkir ráðið lóðarheitið Ærlækjarsel HÖ1.

Náttúruhamfaratrygging Íslands auk Almannavarna hafa sent sveitarfélögum á Norðurlandi upplýsingar og minnisblað sem lýsir því sem búast má við í tengslum við jarðskálftaatburði sem nú hafa gengið yfir svæðið. Lagt fram til kynningar og umræðu.

Fyrir byggðarráði liggur til staðfestingar húsaleigusamningur milli Orkuveitu Húsavíkur ohf. og félagsþjónustu Norðurþings vegna afnota af fasteigninni Vallholtsvegi 3 í eigu Orkuveitu Húsavíkur ohf. fyrir frístundastarfsemi félagsþjónustunnar.

Fyrir byggðarráði liggur viðauki við fjárhagsáætlun 2020 sem samþykktur var í skipulags- og framkvæmdaráði vegna flutnings á 10 milljónum króna af framkvæmda-/fjárfestingaáætlun ársins yfir á rekstur málaflokks 09 vegna styrks til framkvæmda við Hafnarstétt 7 - Naust.

Á 67. fundi fjölskylduráðs var bókað;

Fjölskylduráð samþykkir eftirfarandi viðauka fyrir málaflokkinn 02-Félagsþjónusta:
Viðauka fyrir viðbótarlaunakostnaði í tengslum við COVID-19 upp á 8.204.007 kr. og viðauka vegna aukinna umsvifa vegna fjölgunar þjónustuþega upp á 23.292.844 kr. og vísar þeim til byggðarráðs.

Borist hefur erindi frá Heiðari Halldórssyni þar sem hann segir sig úr stjórn Húsavíkurstofu. Fyrir byggðarráði liggur að tilnefna nýjan fulltrúa í stjórnina.

Fyrir liggur að nýting veiðidaga í Litluárvötnum mun ekki verða í samræmi við væntingar og því býðst eigendum Veiðifélags Litluárvatna að nýta 10% af veiðidögum ársins án endurgjalds og falla tíu stangir í hlut Norðurþings samkvæmt því.

Laugardaginn 22. ágúst verður formleg opnun á Dettifossvegi á vegum Markaðsstofu Norðurlands en nánari tímasetning verður send síðar. Óskað er eftir þátttöku sveitarfélaga á svæðinu í viðburðinum.

Fyrir byggðarráði liggur bréf frá Sambandi íslenskra sveitarfélaga vegna beiðnar sveitastjórnarráðherra um að lækka álagningarhlutföll sem nemi að lágmarki þeirri krónutölu sem hækkun fasteignamatsins á milli ára myndi að óbreyttu leiða til a.m.k. hvað atvinnuhúnæði varðar. Í svarbréfi Sambands íslenskra sveitarfélaga kemur fram að það sé í höndum hverrar sveitarstjórnar að meta og ákvarða hvort hún vilji ganga lengra en hvatning sú sem felst í viðspyrnuáætlun Sambandsins vegna COVID-19 þar sem sveitarfélög eru hvött til að hækka ekki fasteignagjöld á atvinnuhúsnæði umfram verðlagsbreytingar árið 2021.

Boðað er til aðalfundar Fjallalambs hf. föstudaginn 26. júní 2020 kl. 16:00.

Fyrir byggðarráði liggur fundargerð 885. fundar stjórnar Sambands íslenskra sveitarfélaga frá 12. júní sl.