Skipulags- og framkvæmdaráð

Umsóknarfrestur um rekstur tjaldsvæða Norðurþings á Húsavík, Kópasker og Raufarhöfn rann út 29 febrúar sl. Alls bárust 4 umsóknir. Fyrir Skipulags- og framkvæmdaráði liggur að taka ákvörðun um næstu skref í málinu.

Bergþór Bjarnason, fjármálastjóri kom á fundinn undir þessum lið.

Framkvæmdaáætlun 2024 yfirfarin.

Fyrir liggur tillaga skipulagsráðgjafa að breytingu deiliskipulags Verslunar- og þjónustusvæðis V3 við golfvöllinn á Húsavík. Breytingarnar taka mið af óskum Góðra hótela ehf. Breytingar felast í breyttum byggingarskilmálum fyrir lóð undir hótel og nýja aðkomu að lóðinni norðanverðri. Byggingarreitur og heimilað byggingarmagn á lóðinni er óbreytt.

Nú er lokið kynningu skipulagslýsingar vegna deiliskipulags Garðarsbrautar 44-48 á Húsavík. Umsagnir við skipulagslýsinguna bárust frá Slökkviliði Norðurþings, Orkuveitu Húsavíkur, Heilbrigðiseftirliti Norðurlands eystra, Minjastofnun, Vegagerðinni, Skipulagsstofnun og Grími vélaverkstæði. Aðeins umsagnir Vegagerðarinnar og Gríms vélaverkstæðis innifela athugasemdir sem tilefni er til að vinna með við deiliskipulagsvinnuna.
Vegagerðin mælist til þess að bílastæði og inn-/útakstur af lóðum verði afmarkaður með skýrum hætti til að auka umferðaröryggi, bæði akandi og gangandi. Vegagerðin minnir á að sýna skal veghelgunarsvæði á skipulagsuppdrætti. Vegagerðin óskar þess einnig að mörk skipulagssvæðis verði miðuð við vegkannt, en nái ekki út á miðjan Norðausturveg.
Ólafur Rúnar Ólafsson, f.h. Gríms hf vélaverkstæðis gerir margháttaðar athugasemdir við skipulagslýsinguna og veitir sveitarfélaginu heimild til að bjóða Rarik aðra valkosti innan sinnar lóðar varðandi staðsetningu spennistöðvar en gengið er út frá í skipulagslýsingu.

Nú er lokið kynningu á tillögu að breytingu deiliskipulags Miðhafnarsvæðis Húsavíkur. Umsagnir/athugasemdir bárust frá: Heilbrigðiseftirliti Norðurlands eystra, Minjastofnun, Vegagerðinni, Skipulagsstofnun og Magna lögmönnum f.h. Gentle Giants Hvalaferða ehf.
Aðeins umsögn Gentle Giants hvalaferða ehf. felur í sér athugasemdir við skipulagstillöguna.
Gentle Giants hvalaferðir ehf. gera athugasemdir við að staða Helguskúrs sé sýnd óbreytt á skipulagsuppdrætti og leggja til að Helguskúr verði felldur út af skipulagsuppdrætti.
Gentle Giants Hvalaferðir ehf. gera einnig athugasemdir við lengingu flotbyggju og leggja fram uppdrátt af afstöðu lengdrar flotbryggju. Óskað er upplýsinga um hvort áhrif lengingar bryggjunnar hafi verið skoðuð með fullnægjandi hætti. Ef svo er ekki er þess óskað að sveitarfélagið rannsaki hvort öryggisskilyrði fyrir inn- og útsiglingar verði ásættanleg eftir lengingu flotbryggjunnar. Ef niðurstaða sveitarfélagsins er sú að lenging nefndar flotbryggju muni ekki hafa teljandi áhrif á öryggisskilyrði er þess óskað að tillögunni verði breytt þannig að einnig verði heimild til lengingar næstu flotbryggju norðan þeirra sem lengd er skv. uppdrætti.

Einar Páll Þórisson og Elva Héðinsdóttir óska byggingarleyfis fyrir viðbyggingu ofan á bílskúrsþak að Álfhóli 9 á Húsavík. Meðfylgjandi erindi eru teikningar unnar af Birki Kúld, byggingarfræðingi hjá BK Hönnun ehf. Viðbygging verði úr timbri og klæðning veggja að utan með loftræstri álklæðningu. Flatarmál viðbyggingar er 48,3 m². Meðfylgjandi umsókn er skriflegt samþykki nágranna að Uppsalavegi 8, 10 og 12, Baughóli 7 og 9 og Álfhóli 7.

Vopnafjarðarhreppur kynnir nú hugmyndir að heildarendurskoðun Aðalskipulags Vopnafjarðarhrepps á Skipulagsgátt. Óskað er umsagna og athugasemda. Gildandi aðalskipulag sveitarfélagsins var staðfest í október 2008 og var ætlað að gilda til ársins 2026. Frá staðfestingu þess hafa verið gerðar lagabreytingar er snúa að skipulagsmálum, ný skipulagslög, lög um náttúruvernd, mannvirkjalög og lög um menningarminjar.

Sýslumaðurinn á Norðurlandi eystra óskar umsagnar um rekstrarleyfi vegna veitingaleyfis í flokki C til handa Golfklúbbi Húsavíkur.

Rekstraraðli Hlöðufell Restaurant ehf óskar eftir heimild til að setja upp skilti á einhvern þriggja ljósastaura við Garðarsbraut á svæðinu frá Bjarnahúsi að Íslandsbanka.

Sigríður Örvarsdóttir, forstöðumaður Menningarmiðstöðvar Þingeyinga óskar leyfis Norðurþings til að setja upp tvö skilti sem merkja Safnahúsið á Húsavík, Hvalasafnið á Húsavík og Könnunarsafnið og að auki eitt leiðbeinandi skilti við Verbúðarþak sem vísar veginn að Safnahúsi.

Matvælaráðuneytið hefur falið Landi og skógi að hefja endurskoðun á núverandi fyrirkomulagi stuðningskerfa í landgræðslu og skógrækt. Tilgangur þessa erindis nú er að kalla eftir ábendingum sem nýst geta við vinnuna við að móta tillögur að endurskoðuðu stuðningskerfi, en markmiðið er að til verði tillaga að heildstæðu stuðningskerfi málaflokksins innan stofnunarinnar sem jafnframt styður við stefnu stjórnvalda á sviði loftslagsmála, verndunar líffræðilegrar fjölbreytni og byggðamála.

Stuðningskerfin sem um ræðir eiga að efla þátttöku einstaklinga, félagasamtaka, fyrirtækja og stofnana í landgræðslu og skógrækt, meðal annars í samræmi við opinberar stefnur í umhverfismálum, loftslagsmálum, landbúnaði og atvinnumálum.

Matvælaráðuneyti hefur sent Norðurþingi minnisblað frá febrúar 2024 vegna regluverks um búfjárbeit.