Ósk um leyfi til deiliskipulagsgerðar á landi Akursels

Skipulags- og framkvæmdaráð fellst á að hafin verði vinna við deiliskipulagningu Akursels. Ráðið telur að samhliða verði að vinna að tillögu að breytingu aðalskipulags.

Skipulags- og framkvæmdaráð leggur til við sveitarstjórn að skipulags- og byggingarfulltrúa verði falið að kynna skipulagslýsinguna.

Til máls tók: Soffía.

Sveitarstjórn samþykkir samhljóða tillögu skipulags- og framkvæmdaráðs.

Skipulags- og framkvæmdaráð þakkar fram komnar athugasemdir og ábendingar. Ráðið vísar þeim til yfirferðar hjá skipulagsráðgjafa vegna framhalds skipulagsvinnu.

Skipulags- og framkvæmdaráð fellst á það upplegg sem liggur fyrir, þ.e. að unnið verði að breytingu aðalskipulags vegna fiskeldismannvirkja í landi Akursels og deiliskipulags sama svæðis. Í kynntri skipulagslýsingu var horft til þess að stærri hluti jarðarinnar yrði deiliskipulagður. Ráðið minnir á umsögn Skipulagsstofnunar, dags. 10. nóvember s.l. vegna kynntrar lýsingar þar sem ábending kemur fram um að vinna skipulagsgögn og umhverfismat vegna sjótöku samhliða.

Skipulags- og framkvæmdaráð felur skipulags- og byggingarfulltrúa að kynna fyrirliggjandi skipulagshugmyndir á íbúafundi samhliða tillögu að breytingu aðalskipulags.

Skipulags- og framkvæmdaráð leggur til við sveitarstjórn að skipulagsfulltrúa verði falið að kynna skipulagstillöguna á vinnslustigi á opnu húsi og á vefsíðu Norðurþings.

Til máls tók: Soffía.

Sveitarstjórn samþykkir samhljóða tillögu skipulags- og framkvæmdaráðs.

Skipulags- og framkvæmdaráð leggur til við sveitarstjórn að skipulagsfulltrúa verði falið að auglýsa deiliskipulagsbreytinguna skv. ákvæðum skipulagslaga samhliða kynningu breytingar aðalskipulags.

Til máls tók: Soffía.

Sveitarstjórn samþykkir samhljóða tillögu skipulags- og framkvæmdaráðs.

1.1. Fiskistofa bendir á að ekki sé fjallað um möguleg áhrif á náttúrulega laxfiskastofna í umhverfismatsskýrslu með kynntum skipulagsbreytingum.
1.2. Fiskistofa bendir á að framkvæmdir í eða við veiðivatn, allt að 100 m frá bakka kunni að vera háðar leyfi Fiskistofu. Með umsókn þar að lútandi skal fylgja umsögn sérfræðings vegna hugsanlegra áhrifa á lífríkið og umsögn viðkomandi veiðifélags.
2. HNE gerir ekki athugasemdir við skipulagstillöguna.
3. Minjastofnun gerir ekki athugasemdir við skipulagstillöguna.
4. RARIK áréttar að aðveitustöðin í Núpsmýri og allar lagnir að henni þurfa að vera áfram til staðar innan skipulagssvæðis.
5.1. Umhverfisstofnun minnir á ákvæði skipulagslaga og náttúruverndarlaga um almannarétt til umferðar um vatns-, ár- og sjávarbakka. Óheimilt sé að setja girðingu á vatnsbakka þannig að hindri umferð gangandi manna.
5.2. Umhverfisstofnun vekur athygli á lögum um stjórn vatnamála nr. 36/2011 þar sem markmið er að vernda allt vatn og vistkerfi þess, hindra frekari rýrnun vatnsgæða og bæta ástand vatnavistkerfa. Tillaga að breytingu á aðalskipulagi og deiliskipulagi í landi Akursels vegna fiskeldis að Núpsmýri þurfi að vera í samræmi við stefnumörkun vatnaáætlunar. Áður en viðeigandi stjórnvöld veita leyfi til starfseminnar verður að liggja fyrir mat á áhrifum á vatnshlot og hvort framkvæmdin get valdið því að umhverfismarkmið vatnshlotanna náist ekki.
5.3. Stefna stjórnvalda felur í sér að hætta skuli alfarið urðun lífbrjótanlegs úrgangs og hefur UST unnið leiðbeiningar til aðila í fiskeldi á landi um endurnýtingarmöguleika fastefna úr frárennsli. Ef nota á fastefni sem áburðarefni skal leita samþykkis Matvælastofnunar.
5.4. Umhverfisstofnun bendir á að hugað sé að fuglalífi við framkvæmdir skv. skipulagstillögunum. Mikilvægt sé að framkvæmdir á svæðinu séu utan varptíma fugla.
5.5. Umhverfisstofnun bendir á að skilt sé að afla framkvæmdaleyfis, eða eftir atvikum byggingarleyfis, vegna allra framkvæmda sem fela í sér röskun á svæðum sem njóta sérstakrar verndar. Ákveði leyfisveitandi að veita leyfi til framkvæmda á svæðum sem njóta sérstakrar verndar skal hann rökstyðja þá ákvörðun sérstaklega og gera grein fyrir öðrum kostum sem skoðaðir hafa verið sem mögulegir valkostir við útfærslu framkvæmdarinnar og ástæuðum þess að þeir urðu ekki fyrir valinu. Einnig skal gera grein fyrir fyrirhuguðum mótvægisaðgerðum.
6. Hverfisráð Öxarfjarðar gerir ekki athugasemd við skipulagstillöguna.
7.1. Náttúrufræðistofnun telur nokkuð þétt varp svartbaks á skipulagssvæðinu. Í ljósi þess að svartbakur er skilgreindur sem tegund í hættu er mikilvægt að vernda varpstöðar hans. Væntanlegar framkvæmdir innan skipulagssvæðis gætu haft áhrif á varp svartbaks á Oddsnesi og afla þarf nýrra gagna um stöðu varpsins þar til að leggja mat á hversu afdrifaríkt slíkt rask getur orðið. Mikilvægt er að framkvæmdir verði utan varptíma til að lágmarka áhrif á varpfugla.
7.2. Á Austursandi eru gasaugu á landi sem er óalgengt. Mikilvægt er að gasaugum verði vöktuð svo hægt verði að grípa til aðgerða ef nýting jarðhita fyrir fiskeldi hefur neikvæð áhrif á þau.
7.3. Gera þarf betri grein fyrir losun eða förgun lífrænna efna sem skapast við fiskeldið (mykjutankur) og áhrif þess á lífríki svæðisins í sjó og á landi.

Skipulags- og framkvæmdaráð þakkar fram komnar umsagnir og óskar þess að gerðar verði eftirfarandi breytingar á deiliskipulagstillögu í ljósi þeirra athugasemda sem fram koma í umsögnum:
1. Fjalla þarf um möguleg áhrif stækkunar fiskeldisins á náttúrulega laxfiskastofna í umhverfisskýrslu deiliskipulagsins.
2. Bæta skal í greinargerð deiliskipulagstillögunnar umfjöllun um að mögulega þurfi að afla leyfis hjá Fiskistofu vegna framkvæmda nær veiðivatni en 100 m.
3. Bæta þarf í umfjöllun greinargerðar að aðveitustöð RARIK og lagnir að henni verði áfram til staðar innan skipulagssvæðisins.
4. Bæta þarf í greinargerð umfjöllun um almannarétt við ár- og sjávarbakka sbr. umsögn UST.
5. Bæta þarf í greinargerð umhverfisskýrslu umfjöllun um möguleg áhrif starfsemi á aðliggjandi vatnshlot sbr. umsögn UST.
6. Bæta þarf í greinargerð deiliskipulagsins umfjöllun um framkvæmdaleyfi á svæðum sem njóta sérstakrar verndar sbr. umsögn UST.
7. Bæta þarf í greinargerð upplýsingum um varp svartbaks á skipulagssvæðinu og að framkvæmdaaðili þurfi að afla nýrra gagna um stöðu varpsins áður en framkvæmdaleyfi verði veitt. Ennfremur komi fram að framkvæmdir á svæðinu skuli sem mest vera utan varptíma fugla.
8. Bæta þarf í greinargerð umfjöllun um vöktun gasaugna á Austursandi vegna aukinnar nýtingar jarðhita á skipulagssvæðinu.
9. Í umhverfisskýrslu þarf að fjalla nánar um losun og förgun lífrænna efna sem skapast við fiskeldið og áhrif þess á lífríki svæðisins í sjó og á landi.

Skipulags- og framkvæmdaráð felur skipulagsfulltrúa að láta vinna ofangreindar lagfæringar á deiliskipulagstillögu og kynna tillögu þar að lútandi fyrir ráðinu við fyrsta tækifæri.

Skipulags- og framkvæmdaráð telur að með breyttri tillögu hafi verið komið til móts við sjónarmið ráðsins frá 9. júlí s.l. með fullnægjandi hætti og leggur því til við sveitarstjórn að skipulagstillagan verði samþykkt og gildistaka þess auglýst þegar samsvarandi breyting aðalskipulags hefur verið auglýst.

Sveitarstjórn samþykkir samhljóða tillögu skipulags- og framkvæmdaráðs.