Skipulags- og framkvæmdaráð

Á fundi skipulags- og framkvæmdaráðs 10. júlí s.l. var skipulags- og byggingarfulltrúa falið að undirbúa vinnu við endurskoðun aðalskipulags Norðurþings. Skipulags- og byggingarfulltrúi óskaði eftir verkefnistillögu og kostnaðarmati hjá Alta vegna uppfærslu skipulagsins. Árni Geirsson hjá Alta kom til fundarins og kynnti hugmynd að verkefnistillögu um endurskoðun aðalskipulags Norðurþings.

Stefán Pétursson óskar samþykkis fyrir stofnun leigulóðar undir einbýlishús í landi Klifshaga 2 í Öxarfirði. Með umsókn fylgir hnitsett lóðarblað auk yfirlýsinga frá eigendum Klifshaga 1 og Klifshaga Haga um að þeir geri ekki athugasemdir við uppbyggingu íbúðarhúss á lóðinni. Lóðin er 2.500 m² að flatarmáli.

Skeljungur óskar eftir leyfi til að fjarlægja þrjá olíugeyma við Hafnarbraut á Raufarhöfn, ásamt lögnum og öðrum mannvirkjum. Unnin hefur verið áætlun um meðhöndlun jarðvegs á rekstrarsvæðinu með tilliti til olíumengunar að niðurrifi loknu. Áætlunin hefur verið samþykkt af Umhverfisstofnun.

Óskað er eftir byggingarleyfi fyrir 19,3 m² húsi við Bakkagötu 4 á Kópaskeri. Meðfylgjandi umsókn er teikning af húsi og afstöðu þess.

Anna Soffía Halldórsdóttir, f.h. móður sinnar Matthildar Zophaníasdóttur, óskar samþykkis fyrir aðkomu að íbúð á neðri hæð Urðargerðis 3 frá Þverholti og að þar verði útbúið bílastæði fyrir eignina. Einnig er því velt upp hvort þarna gætu verið almenn bílastæði sem gætu nýst í vetrarófærð. Inngangur að íbúð Matthildar snýr að Þverholti og hafa eigendur hennar nýtt aðkomu frá Þverholti um langt árabil.

Fanney Hreinsdóttir og Guðmundur Árni Ólafsson óska eftir heimild til afnota af um 30 m² af almennu svæði milli lóða að Laugarbrekku og Höfðavegi.

Rekstraraðili félagsheimilisins Hnitbjargar, Raufarhöfn óskar eftir að keypt verði iðnaðaruppþvottavél í eldhúsið í húsnæðinu. Núverandi uppþvottavél er venjuleg heimilisvél og hefur verið dæmd ónýt. Kostnaður við kaup og tengingu á nýrri iðnaðaruppþvottavél verður kr. 350.000,-. Kvenfélagið Freyja vill styrkja félagsheimilið um kr. 100.000,- sem á að nýta í kaup á nýrri uppþvottavél.

Kostnaðarmat vegna kaupa og uppsetningar vatnsrennibrautar við Sundlaug Húsavíkur var unnið af Faglausn ehf og liggur til grundvallar verkefninu.
Tekin hefur verið saman bókfærður kostnaður vegna verkefnisins, en einnig er lagt fram til kynningar kostnaðarmat þeirra framkvæmda sem eftir standa til þess að ganga frá svæðinu í kringum rennibrautina og afmarka það. Ketill Gauti Árnason kynnti málið.

Fyrir skipulags- og framkvæmdaráði liggur ósk frá íbúum við Auðbrekku á Húsavík um lækkun hámarkshraða úr 50 í 30 km/klst. Einnig er óskað eftir því að gatan fái eðlilegt viðhald þannig að hún verði aksturshæf.

Borist hafa erindi frá Snæbirni Magnússyni f.h. Klifseigna ehf og fleiri íbúa Raufarhafnar, þar sem farið er fram á að hrossabeit verði ekki leyfð í griðlandi fugla. Hrossin troði niður og eyðileggi varplandið, en naga einnig og brjóta niður skógargróður íbúa. Hann varpar fram þeirri spurningu hvort hægt sé að nota annað beitarland en nú er gert.

Komið hefur fram sú hugmynd að hagkvæmt geti verið að flytja slökkvistöðina á Kópaskeri úr núverandi húsnæði að Bakkagötu 4, í húsnæði þjónustumiðstöðvar á Kópaskeri að Bakkagötu 12.
Með því móti væri mögulegt að lækka rekstrarkostnað sveitarfélagsins, án þess þó að rýra svo nokkru nemi aðstöðu þjónustumiðstöðvar sveitarfélagsins þar.
Þetta byggist þó á því að hagstætt verð fáist fyrir núverandi aðstöðu slökkviliðs á staðnum og að kostnaður við þær breytingar sem ráðast þarf í á húsnæði þjónustumiðstöðvar, fari ekki yfir söluverðmæti Bakkagötu 4.
Fyrir skipulags- og framkvæmdaráði liggur að taka ákvörðun um hvort stefna skuli að þessum flutningi á aðstöðu slökkviliðs á Kópaskeri.

Á 264. fundi Byggðarráðs var eftirfarandi bókað:
Til kynningar í byggðarráði eru tvær fundargerðir hverfisráðs Raufarhafnar frá 4. og 5. fundi ráðsins.

Mál 3. Áningarstaður við gatnamóta á Hólaheiði
Byggðarráð vísar erindinu til skipulags- og framkvæmdanefndaráðs og leggur til að samráð verði haft við Vegagerðina varðandi málið.

Mál 5. Fegrun Raufarhafnar vor og sumar 2019 og mál 6. fasteignir sveitarfélagsins.
Byggðarráð vísar erindunum til skipulags- og framkvæmdaráðs. Málið verði skoðað í samhengi við fegrunaraðgerðir í miðsvæðum/miðbæjum þéttbýliskjarna í Norðurþingi fyrir komandi sumar.

Guðrún Þórhildur sækir um, fyrir hönd Sölkusiglinga, stöðuleyfi fyrir aðstöðuhús við flotbryggju.

Atvinnuþróunarfélag Þingeyinga er að búa til umsókn um framlag úr stefnumótandi byggðaáætlun 2018-2024. Sjá nánari upplýsingar um framlagið á vef Byggðastofnunar. Um er að ræða 13 verkefni á svæðinu frá Kelduhverfi til og með Bakkafirði. Öll verkefnin lúta að innviða- eða áningarstaðauppbyggingu tengda ferðaþjónustu. Umsóknin er enn í vinnslu en fyrir fundinum liggur að taka ákvörðun um að viðhalda salernisaðstöðu við fuglaskýli á Melrakkasléttu ef að styrkur fæst til að setja hana upp.