Fréttir

Auglýst eru laus til umsóknar tvö störf við íþróttamannvirki Húsavíkurbæjar, aðalstarfsstöð við Sundlaugina á Húsavík. Um er að ræða fullar stöður yfir sumartíma en 45 % störf yfir vetrartíma. Önnur staðan er laus frá miðjum maí en hin frá miðjum júlí. Um er að ræða vaktavinnu.

Fjölskyldu- og þjónusturáð Húsavíkurbæjar auglýsir eftir umsóknum um styrki úr Afreks- og viðurkenningarsjóði Húsavíkurbæjar.  Umsóknir skal merkja Afreks- og viðurkenningarsjóði Húsavíkurbæjar og skila til skrifstofu Húsavíkurbæjar Ketilsbraut 7 – 9 640 Húsavík eða á netfangið erla@husavik.is. Úthlutað er úr sjóðnum tvisvar á ári, umsóknir vegna fyrri úthlutunar 2006  skulu berast fyrir 15. apríl nk..

Við sameiningu sveitarfélaganna fjögurra, Húsavíkurbæjar, Kelduneshrepps, Öxarfjarðarhrepps og Raufarhafnarhrepps verður til nýtt sveitarfélag. Verkefnisstjórn um sameiningu sveitarfélaganna efnir til samkeppni um nýtt nafn á sveitarfélagið. Tillögum skal komið á framfæri á skrifstofu einhvers hinna fjögurra sveitarfélaga.

Verkefnisstjórn v/ sameiningar Húsavíkurbæjar, Kelduneshrepps, Öxarfjarðarhrepps og Raufarhafnarhrepps hefur ákveðið að efna til kynnisferðar um hið sameinaða sveitarfélag föstudaginn 24. mars n.k. Af því tilefni verður stjórnsýsluhúsið lokað þann dag.

Stjórnendur Húsavíkurbæjar sátu í gær fyrra af tveimur námskeiðum fyrir stjórnendur um starfsþróunarviðtöl. Leiðbeinandi var Kristján Már Magnússon sálfræðingur hjá Reyni ráðgjafarstofu. Starfsþróunarviðtöl hafa verið tekin um nokkurra ára skeið í skólum sveitarfélagsins og mælst vel fyrir bæði meðal stjórnenda og starfsfólks. Slík viðtöl verða innleidd í allar stofnanir og deildir sveitarfélagsins á árinu 2006.

Bandaríska fyrirtækið Alcoa Corp. og ríkisstjórn Íslands hafa undirritað samkomulag um að hefja ítarlega könnun á hagkvæmni þess að reisa nýtt, 250.000 tonna álver á Bakka við Húsavík. Verði af byggingu þess mun álverið nota rafmagn sem að mestu verður framleitt með vistvænni jarðvarmaorku. Verði ákveðið að reisa nýtt álver á Norðurlandi er fyrstu framkvæmda á svæðinu ekki að vænta fyrr en árið 2010.

Á fundi bæjarstjórnar síðastliðinn þriðjudag var samþykkt að auglýsa til umsóknar 3 lóðir til viðbótar við Stakkholt. Það eru lóðir númer 1, 2 og 4. Einnig eru á ný lausar til umsóknar lóðir við Lyngbrekku númer 9 og 11. Umsóknarfrestur um þessar lóðir er 2 vikur.

Á fundi bæjarstjórnar síðastliðinn þriðjudag, voru samþykktar breytingar á tekjuviðmiðum í reglum um afslátt af fasteignagjöldum til elli- og örorkulífeyrisþega. Íbúar eru hvattir til að kynna sér vel reglurnar en þær má finna hér á heimasíðunni undir liðnum Upplýsingar, reglugerðir og samþykktir.

Á fundi bæjarstjórnar 21. febrúar s.l. var afgreidd ný samþykkt um gatnagerðargjald, stofngjald holræsa, byggingarleyfisgjald og þjónustugjöld. Megin markmiðið með samþykktinni er að gjöld vegna nýbygginga standi undir kostnaði sveitarfélagsins við að veita nauðsynlega þjónustu, þ.m.t. gatnagerð. Skv. eldri samþykkt frá 1997 vantaði nokkuð á að svo væri.

Tillaga að nýju aðalskipulagi fyrir Húsavíkurbær 2005-2025 verður til fyrri umræðu í bæjarstjórn í dag þriðjudag. Hér hægra megin á heimasíðunni má finna skipulagstillöguna í þeirri mynd sem hún fer til umfjöllunar í bæjarstjórn. Undanfarna daga hefur tillagan verið til kynningar hér á heimasíðunni en nú er hún komin í fullan búning eftir lagfæringar og breytingar undanfarið. Skipulags-og byggingafulltrúi.

Þarft þú á þjónustu dagforeldris að halda?   Foreldrum á Húsavík hefur staðið til boða leikskólavist fyrir börn sín frá 9 mánaða aldri og hefur biðtími eftir vistun almennt verið stuttur. Það er m.a. ástæða þess að ekkert dagforeldri starfaði í sveitarfélaginu síðasta ár.

Þann 16. febrúar síðast liðinn skrifuðu Pálmi Pálmason formaður Golfklúbbs Húsavíkur og Erla Sigurðardóttir framkvæmdastjóri Fjölskyldu og þjónustusviðs Húsavíkurbæjar undir samning um rekstur golfvallarins á Húsavík árið 2006. Samningurinn felur í sér vinnu frá þjónustustöð bæjarins sem og afnot af tækjum til jarðvinnu og viðhalds á vellinum. Samningurinn er gerður til reynslu og er samkomulag um að meta samstarfið á haustdögum með áframhald í huga.