Fréttir

Norðurþing, sameinað sveitarfélag í Þingeyjarsýslum, auglýsti störf sveitarstjóra, framkvæmdastjóra Fjármála- og stjórnsýslusviðs og dreifbýlisfulltrúa laus til umóknar 2. júlí sl. og rann umsóknarfrestur út 16. júlí sl.   Alls bárust 12 umsóknir um starf sveitarstjóra, 11 umsóknir um starf framkvæmdastjóra Fjármála- og stjórnsýslusviðs og 6 um starf dreifbýlisfulltrúa.

Hið árlega Ásbyrgismót UNÞ fór fram um síðustu helgi. Hér fyrir neðan má smella á tengla til að nálgast úrslit og stigagjöf. Úrslit Stigagjöf

Byggðarráð valdi í morgun nýtt byggðarmerki fyrir Norðurþing. Fjórir hönnuðir voru fengnir til að senda inn tillögur að byggðarmerki. Það er Hróbjartur Sigurðsson sem hannaði merkið sem varð fyrir valinu. Þess ber að geta að þetta eru aðeins fyrstu drög að merkinu og er líklegt að það taki breytingum. Hróbjartur lýsir tillögu sinni að byggðamerki svo: “Merkið er skýrskotun í söguna um Sleipni sem steig fæti niður í Ásbyrgi og skildi eftir sig hóffar í berginu. Merkið er symmetrískt (miðjuspeglað) sem gefur því klassískt og virðulegt útlit. Hófformið sem situr ofarlega fyrir miðju, myndar kraftmikla byggingu með stuðlaformunum að neðan sem láta merkið sitja vel og veita því festu. Rauður er litur hugrekkis og áræðis en getur einnig táknað þann jarðvarma sem er nokkuð einkennandi fyrir svæðið. ” Byggðarmerki þurfa að fylgja skilyrðum reglugerðar um skráningu byggðarmerkja. Sjá reglugerð hér. Merkið telst því ekki fullgilt byggðarmerki sveitarfélagsins Norðurþings fyrr en einkaleyfastofan hefur staðfest að það uppfylli fyrrgreinda reglugerð.

Hulda Ragnheiður Árnadóttir framkvæmdastjóri Fjármála- og stjórnsýslusviðs sagði starfi sínu lausu þ. 30. júní 2006. Ráðningarsamningur kveður á um 3ja mánaða uppsagnarfrest og er samkomulag um að Hulda Ragnheiður gegni starfinu út uppsagnarfrestinn að frádregnu orlofi. Starfið hefur verið auglýst laust til umsóknar ásamst starfi sveitarstjóra og nýju starfi dreifbýlisfulltrúa. Umsóknarfrestur er til og með 16. júlí 2006.

FRÍTT Í SUND FYRIR 16 ÁRA OG YNGRI.  Samkvæmt ákvörðun sveitarstjórnar Norðurþings 20. júní 2006 og samþykkt fjölskyldu- og þjónusturáðs Norðurþings 03.júlí 2006 er frítt í sund fyrir íbúa sveitarfélagsins 16 ára og yngri á sundstöðum sem sveitarfélagið rekur, þ.e. sundlaugunum á Húsavík og Raufarhöfn.

Sveitarstjórn Norðurþings auglýsir eftir, sveitarstjóra, framkvæmdastjóra og dreifbýlisfulltrúa. Til að sjá auglýsinguna smellið hér.

Á Raufarhöfn stendur til að setja niður ný leiktæki við grunnskólann og mun Þjónustumiðstöðin sjá um þær framkvæmdir. Verður þetta mikil breyting fyrir nemendur. Á Húsavík á að setja ný leiktæki á tjaldstæðið og mun Trésmiðjan Val sjá um þær framkvæmdir.

Nú eru að hefjast framkvæmdir við leikskólann Bestabæ. Byggð verður viðbygging til vesturs og eldra húsnæði gert upp. Það er Trésmiðjan Rein sem sér um framkvæmdir fyrir Eignarhaldsfélagið fasteign ehf. Gert er ráð fyrir að nýr 6 deilda leikskóli verði fullbúinn haustið 2007.

Fyrsti fundur sveitarstjórnar Norðurþings var haldinn 13. júní 2006 kl. 16.00. Sveitarstjórn ákvað skipan í nefndir og ráð ásamt því að fjalla um nýjar samþykktir um stjórn og fundarsköp nýs sveitarfélags.

Síðasti fundur bæjarstjórnar Húsavíkurbæjar verður haldinn þriðjudaginn 6. júní  kl. 16.00 í Miðhvammi, sal Dvalarheimilis aldraðra á Húsavík.Dagskrá fundarins verður birt eftir hádegi föstudaginn 2. júní. 

 Frá og með 1. júní hefur þjónustutíma stjórnsýsluhúss verið breytt þannig að opið er frá kl. 8.30 til 16.00. Athygli viðskiptavina er vakin á því að ekki er lengur tekið við peningum í afgreiðslu, heldur einungis debetkortum. Húsavíkurbær Framkv.stjóri Fjármála- og stjórnsýslusviðs Hulda Ragnheiður Árnadóttir

Tillaga að nýju aðalskipulagi Húsavíkurbæjar 2005-2025 hefur verið auglýst til kynningar. Kynning skipulagstillögunnar stendur í 4 vikur miðað við mánudaginn 22. maí. Að auki eru 2 vikur fyrir íbúa Húsavíkurbæjar og annarra er telja sig hagsmuna hafa að gæta til að gera skriflegar athugasemdir við tillöguna. Frestur til að gera athugasemd rennur því út 2. júlí nk.