Fréttir

Fimmtudaginn 10. apríl úthlutaði Menningarráð Eyþings verkefnastyrkjum til menningarstarfs á starfssvæði Eyþings. Er þetta önnur úthlutun ráðsins og fór athöfnin fram í Tónlistarhúsinu Laugarborg að viðstöddu fjölmenni. Ávörp fluttu Helga Haraldsdóttir skrifstofustjóri ferðamála í iðnaðarráðuneyti og Sigrún Björk Jakobsdóttir, formaður menningarráðs. Flutt voru tónlistaratriði af styrkþegum sem og danssýning frá Vefaranum.

Lokahátíðir Stóru upplestrarkeppninnar í Þingeyjarsýslum voru haldnar 10. og 11. apríl s.l.  Skáld Stóru upplestrarkeppninnar að þessu sinni voru tvö: Jón Sveinsson og Steinn Steinarr. Fyrri lokahátíðin var haldin í Félagsheimilinu Hnitbjörgum á Raufarhöfn fimmtudaginn 10. apríl. Keppendur voru nemendur úr 7. bekk Öxarfjarðarskóla, Grunnskóla Raufarhafnar, Grunnskóla Svalbarðshrepps og Grunnskóla Þórshafnar. Síðari lokahátíðin var haldin í Safnahúsinu á Húsavík föstudaginn 11. apríl.  Keppendur voru nemendur úr 7. bekk Borgarhólsskóla, Hafralækjarskóla, Litlulaugaskóla og Reykjahlíðarskóla.

Undirbúningur gengur vel fyrir álver á Bakka við Húsavík Alcoa mun síðar í þessum mánuði leggja fram hjá Skipulagsstofnun tillögu að matsáætlun fyrir mat á umhverfisáhrifum vegna álvers á Bakka við Húsavík með um 250.000 tonna framleiðslugetu á ári. Þetta var meðal þess sem kom fram á fjölmennum borgarafundi sem sveitarfélagið Norðurþing stóð fyrir á Húsavík í kvöld, fimmtudaginn 3. apríl. Á fundinum kynntu fulltrúar Norðurþings, Landsnets, Landsvirkjunar, HRV og Alcoa undirbúning og stöðu mála varðandi fyrirhugað álver á Bakka við Húsavík.  

KEA auglýsir eftir styrkumsóknum úr Menningar- og viðurkenningasjóði félagsins. Styrkúthlutunin að þessu sinni tekur til tveggja flokka þar sem auglýst er eftir umsóknum úr flokki Ungra afreksmanna annars vegar og úr flokki íþróttamála hins vegar.

SKIPULAGSDAGUR Í NORÐURÞINGI - aðalskipulagsgerð - Íbúum Norðurþings er boðið til vinnustofu um skipulagsmál í Norðurþingi laugardaginn 19. apríl nk. í Skúlagarði kl. 10.30-15.00. Markmið vinnustofunnar er að afla upplýsinga um einkenni sveitarfélagsins og sýn íbúa, landeigenda og félagasamtaka á áherslur í dreifbýli. Skipulagsráðgjafar frá Alta munu stýra fundinum. Allir eru velkomnir. Félagasamtök, landeigendur og fasteignaeigendur í dreifbýli eru einkum hvattir til að nýta þetta tækifæri til að hafa áhrif á stefnu um þróun byggðar, umhverfismál og landnotkun. Takið daginn frá! Nánar auglýst í næstu viku.

Í gær, 1. apríl, var fyrsti opnunardagur vetrarins á skíðasvæði Húsvíkinga í Skálamel.  Aðstæður voru hinar ágætustu og skemmtu börnin sér konunglega fram á kvöld en opið var til klukkan 21:00.  Þónokkrir fullorðnir skíðamenn brugðu sér einnig á skíði og skemmtu sér ekki síður en ungviðið. Opnun skíðasvæðisins er sem hér segir á meðan að snjóalög leyfa: Opnunartími skíðasvæðisins í Skálamel

Námskeið fyrir verðandi dagforeldra verður haldið á Akureyri og hefst það miðvikudaginn 16. apríl n.k.  Áætlað er að því ljúki 31. maí n.k. og mun Norðurþing taka þátt í að niðurgreiða kostnað vegna námskeiðsins. Hér má sjá nánari upplýsingar um námskeiðið Áhugasamir í Norðurþingi snúi sér til Erlu Sigurðardóttur menningar- og fræðslufulltrúa, í síma 464-6100 eða á netfangið erla@nordurthing.is, sem veitir allar frekari upplýsingar.

Fræðsla og námskeið um skólagöngu barna með athyglisbrest og ofvirkni var haldið á Akureyri dagana 13. og 14. mars síðastliðinn.  Námskeiðið er á vegum ADHD samtakanna og ætlað fyrir kennara og annað starfsfólk gunnskóla. Eftirfarandi skólar/aðilar tóku þátt í námskeiðinu: Skólar í Þingeyjarsýslum, þátttakendur voru 11 Grunnskólar á Akureyri, þátttakendur voru 53 Dalvíkurbyggð, þátttakendur voru 3 Starfsmenn skólaþjónustu Akureyrar, þátttakendur voru 2

Síðastliðinn fimmtudag var haldinn opinn fundur um Mærudaga 2008. Fundurinn var ágætlega sóttur og komu ýmsar hugmyndir fram. Fundurinn var haldinn m.a. til að opna fyrir allar þær hugmyndir sem fólk hefur til að gera þessa daga eins skemmtilega og kostur er. En undirbúningur að Mærudögum er í fullum gangi og þessi fundur aðeins liður í því að skipuleggja þessa hátíð.

Fimmtudaginn 3. apríl,  verður haldinn borgarafundur um verkefnið Sjálfbært samfélag, álver á Bakka. Fundurinn verður haldinn í félagsheimilinu á Húsavík. Á fundinn mæta fulltrúar Alcoa, Landvirkjunar, Landsnets, og iðnaðarráðuneytisins. Markmið fundarins er að kynna undirbúning og stöðu þessa mikilvæga verkefnis og svara fyrirspurnum íbúa. Nánari dagskrá og tímasetning verða auglýst síðar. F.h. Norðurþings Bergur Elías Ágústsson Sveitarstjóri

Í framhaldi af könnun á þörf fyrir þjónustu dagforeldra hefur sveitarstjórn samþykkt að endurskoða reglur um greiðslur til dagforeldra og styðja við starfsemi dagforeldra í sveitarfélaginu. Menningar- og fræðslufulltrúa hefur verið falinn framgangur verkefnisins. Áhugasömum aðilum í Norðurþingi hefur verið tryggður aðgangur að námskeiði fyrir verðandi dagforeldra sem haldið verður á Akureyri strax efti páska. Foreldrum sem tóku þátt í könnun vegna þjónustu dagforeldra er þökkuð þáttakan og ánægjulegt samstarf. Sjá nánar hér

Menningar- og fræðslunefnd Norðurþings auglýsir eftir framkvæmdaraðila/aðilum að sumartónleikum 2008.  Tónleikarnir eru styrktir af Lista- og menningarsjóði. Þetta er frábært tækifæri fyrir hæfileikaríka einstaklinga.  Umsóknarfrestur er til 15. apríl. Sjá nánar í auglýsingu