Fréttir

Á fundi byggðarráðs Norðurþings í gær var bókuð eftirfarandi áskorun til Alþingis Íslands: "Byggðarráð Norðurþings harmar það að leyfa eigi frjálsan innflutning á ferskum kjötvörum og öðrum landbúnaðarvörum til landsins. Sú aðgerð mun hafa gríðarleg áhrif á atvinnulíf í landinu og mun koma harðast niður dreifbýlinu og þó sérstaklega bændum. Mikil kostnaðaraukning hefur átt sér stað í kjötframleiðslu t.d. á áburði,eldsneyti,plasti og korni, svo fá dæmi séu nefnd, og svo ef sala dregst saman á Íslensku kjöti vegna innflutnings erlends fersks kjöts þá mun það verða eitt áfallið enn. Þessi óhefti innflutningur á hráu kjöti kemur því á mjög slæmum tíma fyrir Íslenska kjötframleiðendur. Byggðarráð Norðurþings skorar því á Alþingi Íslands og þingmenn að beita sér fyrir því að afgreiðslu frumvarpsins verði frestað eða frumvarpið hreinlega fellt niður.

Margt var um að vera á Raufarhöfn þann 13. maí sl.  Þá var formlega opnuð heilsugæslustöð Heilbrigðisstofnunar Þingeyinga.  Auk þess var til sýnis nýtt áhaldahús Norðurþings sem staðsett er á Raufarhöfn.  Um kvöldið var svo opinn fundur um atvinnumál á svæðinu.

Formaður ADHD samtakanna, Ingibjörg Karlsdóttir félagsráðgjafi hélt fyrirlestur í Hvalasafninu þann 17. apríl  síðastliðinn.  Var fyrirlesturinn ætlaður foreldrum, kennurum og öðru starfsfólki skóla.  Fyrirlesturinn var mjög vel sóttur og var nærri fullur fundarsalur.    Í fyrirlestrinum var m.a. helstu einkennum ADHD hjá börnum og fullorðnum lýst og ADHD samtökin kynnt. 

Vegna fæðingarorlofs er auglýst eftir forstöðumanni að Bókasafninu á Húsavík til afleysinga  í 100% starf í allt að 2 ár  frá 1. september 2008. Um er að ræða fjölbreytt starf á nútímalegu safni. Við leitum að einstaklingi sem býr yfir skipulagshæfileikum, færni í mannlegum samskiptum og hefur reynslu af öflun og miðlun upplýsinga. Æskilegt er að umsækjendur hafi lokið námi í bókasafns - og upplýsingafræðum eða annarri háskólamenntun sem nýtist í starfi og hafi góða þekkingu á tölvum og möguleikum hugbúnaðar í safnaþjónustu.  

Dagana 5. og 6. maí verður haldin námssmiðja fyrir hagsmunaðila og áhugafólk um ferðaþjónustu á Norðausturlandi. Námssmiðjan er hluti af stefnumótunarvinnu AÞ í ferðamálum á svæðinu, og að henni koma innlendir og erlendir fræðimenn auk frumkvöðla úr heimabyggð. Dagskráin skiptist í tvö þemu og verður einn dagur helgaður hvoru. Sjá nánar um dagskránna hér

  Norðurþing mótar framtíðarsýn 28.4.2008 Norðurþing hefur ákveðið að vinna nýtt aðalskipulag fyrir sveitarfélagið. Búsetuþróun á svæðinu, nýting og verndun náttúruauðlinda og áform um álver kalla á að Norðurþing móti sér framtíðarsýn og setji niður stefnu um byggðaþróun og landnotkun. Í aðalskipulagsvinnunni verður lögð sérstök áhersla á að marka stefnu um miðbæ Húsavíkur þannig að uppbyggingu hans verði með stýrt í átt að skýrri heildarsýn á þennan kjarna sveitarfélagsins. Einnig verður lögð áhersla á greiningu og stefnumörkun um landslag, í ljósi fjölbreytni þess, verðmætis og þýðingar fyrir búsetuskilyrði og ferðaþjónustu í Norðurþingi.

Fimmtudaginn 17. apríl hófst formlega vinna að nýju aðalskipulagi fyrir Norðurþing.  Þá var undirritaður verksamningur við Ráðgjafafyrirtækið Alta um skipulagsráðgjöf og vinnslu skipulagstillögu.  Í framhaldi af undirskrift verksamnings  var haldinn fundur þar sem nefndarfólki Norðurþings og stjórnendum var kynnt verkáætlun skipulagsvinnunnar og svo farið yfir helstu viðfangsefni sem taka þarf á í skipulagsvinnunni. 

Vegna handboltamóts, sumardagsins fyrsta og 1. maí verður opnunartími Sundlaugar Húsavíkur sem hér segir:   24/4 Sumardagurinn fyrsti   10 - 18 25/4 Föstudagur   6:45 - 21 26/4 Laugardagur   10 - 17 27/4 Sunnudagur   10 - 13 01/5 1. maí   10 - 13   Forstöðumaður

Fimmtudaginn 10. apríl úthlutaði Menningarráð Eyþings verkefnastyrkjum til menningarstarfs á starfssvæði Eyþings. Er þetta önnur úthlutun ráðsins og fór athöfnin fram í Tónlistarhúsinu Laugarborg að viðstöddu fjölmenni. Ávörp fluttu Helga Haraldsdóttir skrifstofustjóri ferðamála í iðnaðarráðuneyti og Sigrún Björk Jakobsdóttir, formaður menningarráðs. Flutt voru tónlistaratriði af styrkþegum sem og danssýning frá Vefaranum.

Lokahátíðir Stóru upplestrarkeppninnar í Þingeyjarsýslum voru haldnar 10. og 11. apríl s.l.  Skáld Stóru upplestrarkeppninnar að þessu sinni voru tvö: Jón Sveinsson og Steinn Steinarr. Fyrri lokahátíðin var haldin í Félagsheimilinu Hnitbjörgum á Raufarhöfn fimmtudaginn 10. apríl. Keppendur voru nemendur úr 7. bekk Öxarfjarðarskóla, Grunnskóla Raufarhafnar, Grunnskóla Svalbarðshrepps og Grunnskóla Þórshafnar. Síðari lokahátíðin var haldin í Safnahúsinu á Húsavík föstudaginn 11. apríl.  Keppendur voru nemendur úr 7. bekk Borgarhólsskóla, Hafralækjarskóla, Litlulaugaskóla og Reykjahlíðarskóla.

Undirbúningur gengur vel fyrir álver á Bakka við Húsavík Alcoa mun síðar í þessum mánuði leggja fram hjá Skipulagsstofnun tillögu að matsáætlun fyrir mat á umhverfisáhrifum vegna álvers á Bakka við Húsavík með um 250.000 tonna framleiðslugetu á ári. Þetta var meðal þess sem kom fram á fjölmennum borgarafundi sem sveitarfélagið Norðurþing stóð fyrir á Húsavík í kvöld, fimmtudaginn 3. apríl. Á fundinum kynntu fulltrúar Norðurþings, Landsnets, Landsvirkjunar, HRV og Alcoa undirbúning og stöðu mála varðandi fyrirhugað álver á Bakka við Húsavík.  

KEA auglýsir eftir styrkumsóknum úr Menningar- og viðurkenningasjóði félagsins. Styrkúthlutunin að þessu sinni tekur til tveggja flokka þar sem auglýst er eftir umsóknum úr flokki Ungra afreksmanna annars vegar og úr flokki íþróttamála hins vegar.