Fréttir

Skólaslit Borgarhólsskóla fóru fram í sal skólans föstudaginn 1. júní. Athafnir á yngsta og miðstigi voru kl. 10 og 11. Skólastjóri ávarpaði gesti, nemendur fluttu tónlist og enduðu með samverustund með kennara sínum.  Degi fyrr voru nemendur og forráðamenn yngsta og miðstigs kallaðir til einkaviðtals við umsjónarkennara og fengu námsmat vorannar í hendur.  

Húsavíkurkirkja verður 100 ára 2. júní en hún var  vígð 2. júní 1907. Rögnvaldur Ólafsson arkitekt teiknaði kirkjuna sem er krosskirkja, byggð úr norskum við. Rögnvaldur var fyrsti Íslendingurinn sem nam byggingarlist og raunar fyrsti nútíma húsameistarinn sem Íslendingar eignuðust. Margir telja að Húsavíkurkirkja sé hans fegursta verk og lofi meistara sinn. Aðalhleðslumaður við grunn kirkjunnar var Jón Ármann Árnason steinsmiður, Fossi, Húsavík. Yfirsmiður var Páll Kristjánsson smiður og kaupmaður á Húsavík.

Síðast liðinn föstudag útskrifuðust nemendur í leikskólanum Bjarnahúsi sem byrja eiga í fyrsta bekk næsta haust. Þetta eru síðustu nemendurnir sem útskrifast þaðan, en eins og kunnugt er verður leikskólinn lagður niður og nemendur flytjast í nýjan leikskóla við Iðavelli. Kátt var á hjalla og þegar formleg afhending á útskriftarskýrtenum og rósum var lokið var hitað upp í grillinu og Hjálmar Ingimarsson grillaði pylsur ofaní nemendur og gesti. Skoða myndir

Laugardaginn 2. júní ættu tónlistarunnendur á Akureyri og nærsveitum að taka daginn snemma. Þann morgun munu raddir Kvennakórsins Vox feminae undir stjórn Margrétar J. Pálmadóttur og Kvennakórs Akureyrar undir stjórn Arnórs Brynjars Vilbergssonar hljóma víðsvegar um bæinn. Kvennakórinn Vox feminae kemur fljúgandi norður og hittir söngsystur sínar í Akureyrarkirkju kl. 11:15. Kirkjan verður öllum opin sem vilja hlýða á kórana sameina krafta sína og syngja saman nokkur þeirra verka sem eru á efnisskrá kóranna.

Skólaslit Öxarfjarðarskóla voru á miðvikudag. Að venju flutti skólastjóri ávarp og voru 10. bekkingar kvaddir.  Eins voru kvaddir tveir kennarar sem nú hverfa til annarra starfa, þau Erla Dögg og Ingi Þór. Það er alltaf sama eftirsjá af öflugum og góðum nemendum og alltaf er sami söknuður í því að kveðja 10. bekkinga þegar þau halda á brott úr skólanum. En maður kemur í manns stað og er ekki til efa að núverandi 9. bekkingar verði öflugir 10. bekkingar á næsta skólaári. En það er alltaf ákveðin eftirsjá í því að sjá á eftir þessu unga og efnilega fólki úr héraðinu til framhaldsnáms. Skólastarf í vetur gekk mjög vel. Nemendur skólans eiga hrós skilið fyrir fyrirmyndar framkomu og hegðun hvar sem þau voru sem fulltrúar okkar. Á fimmtudag og föstudag verða 7. og 8. bekkur í skólaferðalagi. Stefnan er sett í Skagafjörð en á leiðinni mun verða farið í hvalaskoðun á Húsavík ef veður leyfir. Í Skagafirði verður meðal annars farið í klettaklifur og flúðasiglingu. Í byrjun júní halda síðan 9. og 10. bekkur út fyrir landssteinana í skólaferðalag til Danmerkur. Það er einungis í annað skiptið (að því að umsjónarmaður best veit) sem nemendur úr Lundi fara utan í skólaferðalag. Seinast var farið til Færeyja fyrir tæpum tuttugu árum, eða 1989. Nemendur hafa verið duglegir að vera með ýmsar fjáraflanir fyrir ferðinni og eins hafa fyrirtæki á svæðinu stutt við bakið á þeim til að ferðin verði að veruleika.

Opnunarhátíð var haldin í flugstöðinni á Húsavíkurflugvelli laugardaginn 19. maí.  Flugstöðin hefur verið lokuð í nokkur ár eftir að flug lagðist þar niður. Það voru Norðurþing, Flugstoðir og Fjarðaflug sem buðu til hátíðinnar.  Boðið var upp á veitingar og Ína og hljómsveit spiluðu og sungu nokkur lög.  Landhelgisgæslan mætti á svæðið með þyrlu og sýndu ýmsar kúnstir, einnig var boðið upp á listflug ofl.    Það var gaman að sjá líf og fjör aftur í flugstöðinni  og á flugvellinum.  Skoða myndir

Þátttakendum í hreinsunardegi laugardaginn 19. maí er þökkuð þátttakan.  Hreinsunarátak í Norðurþingi heldur áfram. Á næstu vikum mun sveitarfélagið verða með vörubíla á ferðinni við að fjarlægja garðaúrgang og annað rusl af lóðarmörkum.  Þeir sem vilja losna við stærri hluti utan/innan lóða á Húsavík/Reykjahverfi er bent á að setja sig í samband við verkstjóra þjónustustöðvar í síma 899 3418 sem mun leggja mat á hvort viðkomandi hlutur verður fjarlægður á kostnað sveitarfélagsins. Sérstaklega er ætlunin að hreinsa til á geymslusvæðum sunnan sláturhúss Norðlenska og í Tröllakoti.  Þeir sem eiga þar hluti eru beðnir um að merkja sér þá með skýrum hætti fyrir 31. maí n.k. þar sem fram kemur nafn eiganda og símanúmer og vera í sambandi við verkstjóra þjónustustöðvar varðandi áframhaldandi geymslu viðkomandi hlutar.  Gera má ráð fyrir að þeim hlutum sem ekki er gerð grein fyrir og standa utan lóða verði fargað.

Síðasta laugardag var árlegur hreinsunardagur á Húsavík.  Félagssamtökum var úthlutað svæðum og sáu félagar þess um að hreinsa sitt svæði.  Þrátt fyrir að verður hafi ekki verið með besta móti var ekki annað að sjá að mæting hafi verið góð.  Víða um bæinn mátti sjá fólk á göngu með ruslapoka að tína upp rusl stórt og smátt.  Þegar búið var að gera bæinn fínann var farið í portið við Borgarhólsskóla og gætt sér á grilluðum pylsum, safa og kaffi. 

Þriðjudaginn 15. maí fóru nemendur og starfsfólk Öxarfjarðarskóla í þjóðgarðsferð í Ásbyrgi. Nemendur unglingadeildar höfðu ásamt umsjónarkennurum sínum undirbúið dagskrá í formi pósta þar sem blandað var saman fróðleik og leikjum. Póstunum var dreift um byrgið og gengu yngri deild og miðdeild í sitt hvoru lagi á milli þeirra.

Sundnámskeið fyrir börn sem fædd eru árin 2000, 2001, 2002 og 2003, verður haldið virku dagana frá 04. júní til og með 15. júní í Sundlaug Húsavíkur. Námskeiðin eru fyrir hádegi.  Starfsfólk leikskólanna fylgir þeim börnum sem fædd eru 2001 og 2002 og eru í leikskóla fyrir hádegi.  Börn sem fædd eru 2003 eru á ábyrgð foreldra/forráðamanna. Upplýsingar og skráning eru einungis í sundlauginni í síma 464-6190.  Skráningu skal vera lokið fyrir 25. maí. Athugið ekki verður tekið við skráningu eftir þann tíma. Þátttökugjald er 3000 kr. fyrir hvert barn. Ef fleiri en eitt barn úr fjölskyldu er gjaldið 2500 kr.  Kennarar verða Harpa Aðalbjörnsdóttir og Árný Björnsdóttir. Forstöðumaður.

Kynningarfundur um drög að svæðisskipulagi háhitasvæða í Þingeyjarsýslum og umhverfismati áætlunarinnar var haldinn að Ýdölum í Aðaldal 14. maí 2007.  Frummælendur á fundinum voru:  Gaukur Hjartarson, formaður samvinnunefndar um gerð svæðisskipulagsins, Birna B. Árnadóttir frá Skipulagsstofnun, Þorkell Lindberg Þórarinsson frá Náttúrustofu Norðausturlands, Árni Ólafsson frá Teiknistofu Arkitekta og Jóna Bjarnadóttir frá VGK-Hönnun. 

Sorpsamlag Þingeyinga mun hefja á ný móttöku úrgangns að Víðimóum 2 miðvikudaginn 16. maí. Þangað til eru allir sem mögulega geta frestað að losa sig við rusl, beðnir að gera það þar til opnað verður. Í neyðartilfellum veður tekið á móti úrgangi sem ekki rotnar, þ.e. frá þeim sem alls ekki hafa aðstæður til að geyma hann. Sorpsamlagið þakkar þolinmæði og skilnig sem félaginu hefur verið sýndur í yfirstandandi rekstrarstöðvun. Sorpsamlag Þingeyinga ehf.